देशातील सर्वात लहान विमानतळ कुठे आहे माहितीये का? एका वेळी उतरते एकच विमान; राज्याचे नाव वाचून थक्क व्हाल

भारतात दररोज मोठ्या प्रमाणात हवाई वाहतूक होते. देशातील विविध शहरांत विमानतळं आहेत. यातील काही विमानतळं ही आंतरराष्ट्रीय आहेत, तर काही विमानतळांहून देशांतर्गत वाहतूक होते. विमानतळ ही विमानांना उड्डाण आणि उतरण्यासाठी एक निश्चित जागा आहे. विमानतळावर विमानांसाठी धावपट्टी, टर्मिनल इमारती आणि इतर आवश्यक सुविधा असतात. हैदराबाद येथील राजीव गांधी आंतरराष्ट्रीय विमानतळ हे भारतातील सर्वात मोठे विमानतळ आहे. तर भारतातील सर्वात लहान विमानतळ कुठे आहे, जाणून घ्या…

देशातील सर्वात लहान विमानतळ ‘या’ ठिकाणी

भारतात अनेक विमानतळ आहेत, पण भारतातील ‘बलजेक‘ विमानतळ हे देशातील सर्वात लहान विमानतळ आहे. याला तुरा एअरपोर्ट असेही म्हटले जाते. हे मेघालय राज्यात ईशान्येला ३३ किलोमीटर अंतरावर आहे. विशेषत: हे फक्त २० सीटर विमान डॉर्नियर २२८ साठी तयार केले आहे. या विमातळाचा विस्तार वाढवण्याची मागणी केली जात आहे. या विमानतळावर लहान रनवे आहे. या रनवेचा विस्तार फक्त एक किमीपर्यंत आहे. छोट्या विमानांसाठी या रनवेचा वापर होतो.

या विमानतळावर केवळ एक किलोमीटरची धावपट्टी आहे, ज्यावर फक्त छोटी विमाने उतरवली जातात. या कारणास्तव याला देशातील सर्वात लहान विमानतळ म्हटले जाते. या विमानतळाच्या प्रकल्पाचा प्रस्ताव १९८३ मध्ये देण्यात आला होता आणि १९९५ मध्ये या प्रकल्पाला मान्यता देण्यात आली, त्यानंतर २००८ मध्ये या विमानतळाचं बांधकाम पूर्ण करण्यात आलं; यासाठी १२.५२ कोटी रुपयांचा निधी वापरण्यात आला.