Gujarat Election Results 2022 : जनतेच्या आशीर्वादामुळेच भाजपाचा विजय, पंतप्रधान मोदींनी मानले आभार

हिमाचल प्रदेश भाजपाध्यक्ष जे पी नड्डांचं राज्य असून तेच त्यांना टिकवता आलेलं नाही अशी टीका विधानसभा विरोधी पक्षनेते अजित पवार यांनी केली आहे. ते मुंबईत आयोजित पत्रकार परिषदेत बोलत होते. महाविकास आघाडीच्या नेत्यांच्या बैठकीनंतर ही पत्रकार परिषद आयोजित करण्यात आली होती.

आम आदमी पक्षाला स्थापनेनंतर १० वर्षातच राष्ट्रीय पक्ष म्हणून मान्यता मिळाली आहे. यानंतर दिल्लीचे मुख्यमंत्री आणि आम आदमी पक्षाचे अध्यक्ष अरविंद केजरीवाल यांनी गुजरातमधील जनतेचे आभार मानले आहेत. गुजरातमधील जनतेने आपला राष्ट्रीय पक्ष बनवलं असल्याचं ते म्हणाले आहेत.

देशात फार कमी पक्षांना राष्ट्रीय पक्ष म्हणून मान्यता असून, आता त्यात आपचाही समावेश झाला असल्याचं केजरीवाल यांनी सांगितलं.

“आपचं दोन राज्यात सरकार असून आज तो राष्ट्रीय पक्ष झाला आहे हे ऐकून लोकांना आश्चर्य वाटतं. गुजरातमधील जनतेने दिलेलं प्रेम, सन्मान याबद्दल मी आभारी आहे. मला फार काही शिकायला मिळालं आहे. गुजरात भाजपाचा गड मानला जात असून तो भेदण्यात आम्हाला यश मिळालं आहे. पुढील वेळी तो जिंकू,” असं केजरीवाल म्हणाले आहेत.

गुजरातमधील विजयानंतर उद्धव ठाकरे यांनी पंतप्रधान नरेंद्र मोदी आणि भाजपाचं अभिनंदन केलं आहे. गुजरातचा विजय विक्रमी आणि ऐतिहासिक असल्याचं उद्धव ठाकरे म्हणाले आहेत. “गुजरात निवडणूक पुन्हा एकदा मोदींच्या नेतृत्वात लढवण्यात आली, त्यामुळे जनतेनं भाजपाला भरघोस मतदान केलं,” असं उद्धव ठाकरे म्हणाले आहेत.

“या विजयात महाराष्ट्रातून पळवलेले मोठे उद्योगही फळले असावेत असे दिसते. पंतप्रधान नरेंद्र मोदी ११ तारखेला महाराष्ट्रात येत आहेत. मुंबई महापालिकेच्या निवडणुका डोळ्यासमोर ठेवून ते इथेही भरघोस घोषणा करतील अशी अपेक्षा,” असा टोला उद्धव ठाकरेंनी लगावला आहे.

“आपने गुजरातमध्ये मोठ्या प्रमाणात मतविभागणी करुन भाजपाचा फायदा घडवून आणला हे स्पष्ट आहे. ज्यांचं त्यांचं राजकारण सोयीनुसार चालत असतं,” अशी टीका उद्धव ठाकरेंनी केली आहे.

आम आदमी पक्ष दिल्लीपुरता आहे हे पुन्हा एकदा सिद्ध झालं आहे. गुजरातचा विकास फक्त भाजपाच करु शकतो हेदेखील सिद्ध झालं आहे. प्रचारासाठी गेलो होतो तेव्हाच गुजरातचा मूड दिसत होता. प्रत्येक ठिकाणी मोदींच्या नावे घोषणा दिल्या जात होत्या अशी प्रतिक्रिया राज्याचे उपमुख्यमंत्री देवेंद्र फडणवीस यांनी दिली आहे.

“गुजरातने नेहमीच इतिहास घडवण्याचे काम केले आहे. गेल्या दोन दशकात नरेंद्र मोदींच्या नेतृत्वाखाली भाजपाने गुजरातमध्ये विकासाचे सर्व विक्रम मोडीत काढले आणि आज गुजरातच्या जनतेने भाजपाला आशीर्वाद देत विजयाचे सर्व विक्रम मोडीत काढले,” असं ट्वीट केंद्रीय गृहमंत्री अमित शाह यांनी केलं आहे.

भारतीय क्रिकेटर रवींद्र जाडेजाची पत्नी आणि भाजपाची उमेदवार रिवाबाचा जामनगरमधून विजय झाला आहे. “ज्यांनी मला उमेदवार म्हणून स्वीकारलं, माझ्यासाठी काम केलं, जोडले गेले त्या सर्वांचे मी आभार मानते. हा फक्त माझा नवे तर भाजपाचा विजय आहे,” असं रिवाबाने सांगितलं आहे.

भाजपा कार्यकर्त्यांचा जल्लोष

भारतीय क्रिकेटर रवींद्र जाडेजाची पत्नी रिवाबा जाडेजा जामनगरमधून आघाडीवर आहे. “भाजपाने गेल्या २७ वर्षांमध्ये ज्याप्रकारे काम केलं आहे आणि गुजरात मॉडेलची स्थापन केलं आहे ते पाहता जनतेने भाजपासहितच विकासाचा प्रवास पुढे नेण्याचा निर्णय घेतला आहे. गुजरात नेहमीच भाजपाच्या पाठीशी राहिला असून, यापुढेही राहील,” असा विश्वास रिवाबाने व्यक्त केला आहे.

गुजरातमध्ये ऐतिहासिक विजयाच्या दिशेने वाटचाल सुरु असल्याने पंतप्रधान नरेंद्र मोदी यांनी भाजपाचे गुजरातमधील प्रदेशाध्यक्ष सी आर पाटील यांचं अभिनंदन केलं आहे. सी आर पाटील यांच्या नेतृत्वात भाजपाने गुजरातमधील निवडणूक लढली असून, रेकॉर्डब्रेक कामगिरी केली आहे.

गुजरातमध्ये सलग सातव्यांदा भाजपाची सत्ता येणार असल्याचं जवळपास निश्चित झालं आहे. १० ते ११ डिसेंबरला नव्या मुख्यमंत्र्यांचा शपथविधी होण्याची शक्यता आहे. पंतप्रधान नरेंद्र मोदी या शपथविधीसाठी हजर राहणार आहेत.

गुजरातमध्ये आम्ही खातं उघडलं तरी आम्हाला आनंद होईल- प्रीती मेनन

नरेंद्र मोदी संध्याकाळी ६ वाजता दिल्लीमधील भाजपा कार्यालयात जाणार. कार्यकर्त्यांना संबोधित करण्याची शक्यता आहे.

भाजपाकडून राजकारण करत जे धोरण अवलंबलं जात आहे, त्याचं उदाहरण गुजरातमध्ये पाहायला मिळत आहे. हे लोकशाहीसाठी घातक आहे. मतदानाचा कौल त्यांच्या बाजून आहे, मात्र दबावतंत्र आणि भीतीच्या माध्यमातून हे सर्व झालं आहे असा आरोप काँग्रेसचे प्रदेशाध्यक्ष नाना पटोले यांनी केला आहे.

आम्ही जिथे कमी पडलो आहोत त्याचं आत्मपरीक्षण करु. पुढील निवडणुकीत आम्ही चांगली कामगिरी करण्याकडे लक्ष देऊ असंही यांनी सांगितलं आहे.

मतमोजणीला सुरुवात झाली असून तीन तासांनी भाजपा १४९ जागांवर आघाडीवर असून ५३.६ टक्के मतं मिळाली आहेत. तर दुसरीकडे काँग्रेस १९ जागांवर आघाडीवर असून फक्त २६.६ टक्के मतं मिळाली आहेत. आपला एकूण १२.८ टक्के मतं मिळाली असून फक्त नऊ जागांवर आघाडी आहे.

दिल्ली महानगरपालिकेत मिळालेल्या यशासाठी मी आपचं अभिनंदन करतो. हिमाचल प्रदेश लहान राज्य असलं तरी तेथे काँग्रेस ज्या पद्धतीने लढते आहे त्यासाठी त्यांचे अभिनंदन करावे लागेल. हिमाचलमध्ये काँग्रेसची सत्ता येईल, असंच लोकांना वाटतंय. देशाच्या पुढील निवडणुकींसाठी हे आशादायक चित्र आहे. फक्त विरोधकांनी एकत्र येणं आणि मतविभागणी टाळणं गरजेचं आहे. आपआपसातील मतभेद, हेवेदावे, अंहकार दूर ठेऊन एकत्र लढाई केली तर २०२४ मध्ये देशात परिवर्तन झाल्याशिवाय राहणार नाही असे हे निकाल आहेत. सगळे एकत्र येऊन लढले तर गुजरातमध्येदेखील लोकसभा निवडणुकीतही परिवर्तन होईल, असं संजय राऊत म्हणाले आहेत.

राहुल गांधींच्या भारत जोडो यात्रेचा या निवडणुकांशी संबंध जोडू नये असं मला वाटतं. राहुल गांधी वेगळ्या मिशनवर आहेत. या निवडणुकांचा संदर्भ त्यांच्या यात्रेशी जोडणं चुकीचं आहे. गेल्या दोन महिन्यांपासून काँग्रेस अंतर्गत आणि इतर राजकारणापासून राहुल गांधी दूर आहेत. ते एक वेगळी मोहिम पुढे नेत आहेत. देश जोडणं, देशातील द्वेष नष्ट करणं, लोकांची मनं जोडणं, संघर्ष थांबवणं यासाठी ती यात्रा आहे आणि त्याला चांगलं यश मिळत आहे, असंही ते म्हणाले.

भाजपा १४२ जागांवर आघाडीवर असून ऐतिहासिक विजयाच्या दिशेने वाटचाल करत आहे. यानंतर भाजपा कार्यकर्त्यांकडून जल्लोष केला जात आहे. काँग्रेस २० तर आप सात जागांवर आघाडीवर आहे.

गुजरातचा निकाल अपेक्षित असून आम आदमी पक्ष आणि भाजपाचं साटंलोटं असल्याचा गंभीर आरोप शिवसेना खासदार संजय राऊत यांनी केला आहे. आपने दिल्ली घेतली आणि गुजरात भाजपासाठी सोडलं असा दावा संजय राऊत यांनी केला आहे.

भाजपाचे सूरत पश्चिममधील उमेदवार पूर्णेश मोदी यांनी भाजपा यावेळी सर्व रेकॉर्ड मोडेल असा विश्वास व्यक्त केला आहे. “भाजपा यावेळी सर्व रेकॉर्ड मोडेल. आम्हाला यावेळी सर्वात जास्त जागा आणि सर्वाधिक मतदानाची टक्केवारी असेल. मोठ्या फरकाने आमचे उमेदवार विजयी होतील,” असं ते म्हणाले आहेत.

सुरुवातीच्या कलांमध्ये भाजपाने मोठी आघाडी घेतली आहे. भाजपा १०० हून अधिक जागांवर आघाडीवर आहे. दुसरीकडे काँग्रेस २६ तर आप तीन जागांवर आघाडीवर आहे.

गुजरातमध्ये कोणाची सत्ता येणार याकडे सध्या संपूर्ण देशाचं लक्ष लागलं आहे. सकाळी ८ वाजता मतमोजणीला सुरुवात झाली आहे. भाजपा सलग सातव्यांदा राज्यात सत्तेत येण्यासाठी प्रयत्न करत असताना, आम आदमी पक्षही गुजरातच्या राजकारणात प्रवेश करण्यास उत्सुक आहे.