बलात्कार आणि हत्या प्रकरणात शिक्षा भोगत असलेला डेरा सच्चा सौदाचा प्रमुख गुरमीत राम रहीम याची सोमवारी २१ दिवसांच्या फरलोवर सुटका झाली आहे. गुडगावमध्ये कुटुंबीयांना भेटण्यासाठी हरियाणा सरकारने ही परवानगी दिली आहे. त्याला रोहतकच्या सुनारिया कारागृहात ठेवण्यात आले होते.
पंजाबमधील निवडणुकीच्या १३ दिवस आधी राम रहीमची सुटका झाली आहे. पंजाबमध्ये डेराचे अनुयायी मोठ्या प्रमाणावर आहेत. दरम्यान, हरियाणाचे मुख्यमंत्री मनोहर लाल खट्टर यांनी, जर गुरमीत राम रहीमला पाच राज्यांतील विधानसभा निवडणुकीपूर्वी फरलो मिळाला असेल तर हा निव्वळ योगायोग आहे. त्याचा निवडणुकीशी काहीही संबंध नाही, असे म्हटले होते.
१३ दिवसांवर पंजाब विधानसभा निवडणूक</strong>
२० फेब्रुवारी रोजी पंजाबच्या सर्व ११७ जागांसाठी मतदान होत आहे. पंजाबमध्ये डेराच्या राजकारणाला खूप महत्त्व आहे. माळव्यापासून ते दोआबापर्यंत पसरलेले डेरे राजकीय विजय-पराजयात मोठी भूमिका बजावत आहेत. निवडणूक तज्ज्ञांच्या मते, राम रहीमच्या डेरा सच्चा सौदाने २०१७ च्या विधानसभा निवडणुकीत पडद्याआडून शिरोमणी अकाली दलाला (एसएडी) पाठिंबा दिला होता. या कारणास्तव, दणदणीत पराभव होऊनही, अकालींना सुमारे २५ टक्के मते मिळवता आली.
विधानसभेच्या ६९ जागांवर राम रहीमच्या अनुयायांचा प्रभाव
पंजाब निवडणुकीच्या पार्श्वभूमीवर सिरसा डेरा प्रमुख गुरमीत राम रहीम सिंग याला मिळालेला पॅरोल राजकारणाशी जोडला जात आहे. कारण पंजाबमध्ये डेरा सच्चा सौदाचे अनुयायी मोठ्या संख्येने आहेत आणि ते डेराच्या सूचनेनुसार मतदान करतात. पंजाबच्या राजकारणात माळवा प्रदेश महत्त्वाची भूमिका बजावतो. या भागात विधानसभेच्या ६९ जागा असून या भागात राम रहीमच्या अनुयायांची संख्या लक्षणीय आहे. संपूर्ण राज्यात जवळपास तीन डझन जागांवर डेरा सच्चा सौदाचे अनुयायी आहेत.
डेरा सच्चा सौदासह पंजाबच्या सर्व मोठ्या डेरामध्ये नेत्यांची हजेरी
डेरा किंवा गुरमीत राम रहीम सिंग हे उघडपणे कोणत्याही पक्षाला पाठिंबा देत नाहीत, पण डेरा अनुयायांना कोणत्याही पक्षाच्या बाजूने मतदान करण्याचे संकेत देतो आणि समर्थक मतदान करतात, असे मानले जाते. त्यामुळेच निवडणुका आल्या की डेरा सच्चा सौदासह पंजाबच्या सर्व मोठ्या डेरामध्ये नेते हजेरी लावू लागतात. काँग्रेसचे प्रदेशाध्यक्ष नवज्योतसिंग सिद्धू हे सातत्याने अपवित्रीकरणाचा मुद्दा उपस्थित करत आहेत. त्यामुळे सच्चा सौदाचे अनुयायी संतापले आहेत.
अशा स्थितीत गुरमीत राम रहीम सिंगला पॅरोल मिळणे म्हणजे भाजपाची त्यांच्याबाबतची मवाळ भूमिका म्हणून पाहिले जात आहे. २०१४ मध्ये हरियाणा विधानसभा निवडणुकीत डेराने भाजपाला पाठिंबा दिला आणि त्यांच्या विजयात महत्त्वाची भूमिका बजावली होती. यानंतरही डेराने अनेक निवडणुकांमध्ये भाजपाची बाजू घेतली आहे.
यावेळी पंजाब विधानसभा निवडणुकीत अनेक पक्षांमध्ये लढत आहे. अशा परिस्थितीत जो उमेदवार विजयी होईल, त्याच्या विजयाचे अंतरही कमी असेल. अशा परिस्थितीत गुरमीत राम रहीमने आपल्या समर्थकांना कोणत्याही एका पक्षाला मत देण्यास सांगितले तर त्याचा परिणाम निवडणुकीवर होईल, असे पंजाबच्या राजकीय विश्लेषकांचे मत आहे.
