Women’s World Cup 2025: विश्लेषण: भारतीय महिलांच्या विश्वविजेतेपदात ठरले हे निर्णायक घटक!

शफाली वर्माची अनपेक्षित निवड

मायदेशात सुरू असलेल्या विश्वचषक स्पर्धेत चालून आलेली संधी सोडायची नाही या जिद्दीने भारतीय महिला मैदानात उतरल्या. स्मृती मानधना, शफाली वर्मा, दीप्ती शर्मा, अमनज्योत कौर अशी भारतीय संघातील प्रत्येक मुलीचे नाव या विजेतेपदासाठी घेण्यात येईल. पण, या अंतिम स्वप्नपूर्तीची खरी शिलेदार शफाली वर्मा ठरते. विश्वचषक स्पर्धेसाठी भारतीय संघाची घोषणा झाली, तेव्हा शफालीची संघात निवड करण्यात आली नव्हती. त्यामुळे ती निराश झाली होती. मात्र, यंदा विश्वचषक स्पर्धा खेळणे तिच्या नशिबात होते. तिच्या जागी संधी मिळालेली प्रतिका रावळ मोक्याच्या क्षणी जायबंदी झाली आणि स्पर्धेसाठीच तिला मुकावे लागले. त्यामुळे उर्वरित दोन सामन्यांसाठी निवड समितीने शफालीची निवड केली.

पहिल्या सामन्यात अपयशी ठरल्यानंतर अंतिम सामन्यात शफालीने ७८ चेंडूंत ८७ धावांची आक्रमक खेळी केली आणि स्मृती मानधनाच्या साथीत १०४ धावांची भागीदारी केली. भारताकडून ही सलग तिसरी शतकी भागीदारी होती. त्यानंतर गोलंदाजीत अचानक चेंडू हाती आल्यावर शफालीने महत्त्वाच्या दोन फलंदाजांना बाद केले. तिची ही अष्टपैलू कामगिरी भारताच्या विजयात महत्त्वाची ठरली.

क्षेत्ररक्षणात मोक्याच्या क्षणी चमक

फलंदाजीला साथ देणाऱ्या खेळपट्टीवर दक्षिण आफ्रिका कर्णधार लॉरा वुल्वार्डच्या फलंदाजीच्या जोरावर आपला प्रवास समाधानकारकरित्या करत होते. मात्र, दुसऱ्या बाजूने तिला तगडी साथ मिळाली नाही. या दरम्यान भारतीय महिला खेळाडूंनी क्षेत्ररक्षणही चमकदार केले. यामध्ये अमनज्योतचे क्षेत्ररक्षण निर्णायक ठरले. प्रथम तिने तझमिन ब्रिट्स (२३) हिला थेट फेक करून धावबाद केले. त्यानंतरही वुल्वार्ड खिंड लढवत राहिली होती. शतकानंतर विजयासाठी वेग घेण्याच्या प्रयत्नांत तिने चेंडू हवेतून मारला आणि तो झेल अमनज्योतने पळत येऊन तिसऱ्या प्रयत्नात झेलला. या झेलानेच विश्वकरंडक भारतीय महिलांच्या नावावर निश्चित झाला. त्यानंतर दीप्ती शर्माने खाका हिला धावबाद केले. क्षेत्ररक्षणातील ही तत्परता वैयक्तिक कामगिरीतही लक्षात राहिली.

कर्णधार हरमनप्रीतचा मास्टर स्ट्रोक

आधीच पडलेला पाऊस आणि त्यानंतर प्रखर प्रकाशझोत यामुळे खेळपट्टी तसेच मैदानावर दवं पडायला सुरुवात झाली होती. त्यामुळे खेळपट्टीवर चेंडू काहीसा थांबून येत होता. बाहेरचे मैदानही संथ झाले होते. त्यामुळे फटके मारण्यासाठी फलंदाजांना ताकद वापरावी लागत होती. वुल्वार्ड आणि सून लूस खेळत असताना दक्षिण आफ्रिकाला विजय शक्य वाटत होता. मात्र, हरमनप्रीतच्या नेतृत्व कौशल्याने येथे बाजी मारली. फिरकी गोलंदाजीला मिळत असलेली साथ लक्षात घेता हरमनने शफालीच्या हाती चेंडू सोपविण्याचे धाडस केले. हे धाडस इतके यशस्वी ठरले की शफालीने लूस आणि मॅरिझान कॅप यांना बाद करून दक्षिण आफ्रिकेच्या आव्हानातील हवा एक प्रकारे काढून घेतली.

अष्टपैलू दीप्ती शर्मा

भारतीय महिला संघाच्या विजेतेपदात दीप्ती शर्माची अष्टपैलू कामगिरी तेवढीत महत्त्वाची ठरली. सलामीला स्मृती आणि शफालीच्या भागीदारीनंतर भारतीय संघाचा डाव सावरून घेताना दीप्तीने अखेरच्या षटकंत रिचा घोषला साथीला घेत भारताचे आव्हान भक्कम केले. दीप्तीने चेंडूला धाव या गतीने ५८ चेंडूत ५८ धावांची खेळी केली. त्यानंतर गोलंदाजीत तिने आपला प्रभाव कायम ठेवत ३९ धावांत ५ गडी बाद केले. यामध्ये दक्षिण आफ्रिकेची कर्णधार लॉरा वुल्वार्ड हिची महत्त्वपूर्ण विकेट होती. या विकेटनंतर दक्षिण आफ्रिका सामन्यात कधीच परतू शकले नाहीत.