अभियांत्रिकीचे विद्यार्थी निकालाच्या प्रतीक्षेत

अभियांत्रिकीची परीक्षा संपून अडीच महिने उलटून गेले तरी या परीक्षेचा निकाल न लागल्यामुळे विद्यार्थ्यांमध्ये चिंतेचे वातावरण निर्माण झाले आहे. निकाल अजून आठवडय़ाभरात लागला नाही तर उत्तरपत्रिकांचे पुनर्मूल्यांकन करून त्याचा निकाल लागणे या सर्व प्रक्रियेला विलंब होईल आणि तोपर्यंत पुढच्या सत्राची परीक्षाही सुरू होईल. यामुळे निकाल लवकर लावावा, अशी मागणी आता जोर धरू लागली आहे.
विद्यापीठाने यंदा प्रथमच ऑनलाइन पद्धतीने मूल्यांकन प्रक्रिया सुरू केली होती, पण प्रत्यक्षात ऑनलाइन मूल्यांकनासंदर्भात संबंधित कंपनीला कंत्राट देण्यात २८ दिवस उशीर झाला. त्यामुळे ही सर्व प्रक्रिया लांबणीवर गेल्याचे विश्वसनीय सूत्रांकडून समजते.
ही सर्व प्रक्रिया कंपनीच्या बेंगळुरू येथील केंद्रावर होते आणि तेथून सर्व माहिती विद्यापीठाकडे येते. अभियांत्रिकीच्या सातव्या सत्राची परीक्षा १७ डिसेंबर रोजी संपली होती. यानंतर ४५ दिवसांत निकाल लागणे अपेक्षित होते, पण प्रत्यक्षात तसे न झाल्यामुळे मोठा गोंधळ उडाला आहे. विद्यापीठाने नवीन प्रक्रिया अवलंबिली आहे, यामुळे थोडा उशीर होणे स्वाभाविक आहे. पण हा खूप जास्त उशीर झाला असल्याचे मत सिनेट सदस्य प्रदीप सावंत यांनी व्यक्त केले आहे. विद्यापीठाने लवकरात लवकर निकाल लावावा यासंदर्भात चर्चा करण्यासाठी आम्ही लवकरच कुलगुरूंची भेट घेणार असल्याचेही ते म्हणाले. दरम्यान, निकालाचे काम पूर्णत्वाला आले असून एक ते दोन दिवसांत निकाल लागेल, अशी माहिती परीक्षा नियंत्रक डॉ. पद्मा देशमुख यांनी दिली.