श्रीक्षेत्र नृसिंहवाडीत भाविकांची अलोट गर्दी

श्रावण महिना, गुरुवार आणि कन्यागत पर्वकाल या त्रयोगावर भाविकांनी दत्त दर्शन व स्नानाचा लाभ घेतला. श्रावण पौर्णिमेनिमित्त येथील दत्त मंदिरात पहाटे पाच वाजता काकड आरती झाली. दिवसभर विविध विधी झाले. अनेक भाविकांनी कृष्णा-पंचगंगा नदीचे यथाविधी पूजन करून मनोभावे नदीला नारळ अर्पण केले. दत्त देवस्थानमार्फत कापडी मांडव, दर्शनरांग, मुखदर्शन, स्वयंसेवक, सुरक्षारक्षक, ध्वनिक्षेपक आदी यंत्रणांची उत्तम व्यवस्था केली होती. कन्यागत महापर्वकाल सोहळ्यातील आजच्या श्रावण पौर्णिमेनिमित्त येणाऱ्या भाविकांच्या सोयीसाठी जिल्हा प्रशासनामार्फतही अत्यावश्यक विभागातील अधिकाऱ्यांचा नियंत्रण कक्ष कार्यान्वित करून आजचा सोहळा पार पाडण्यावर लक्ष केंद्रित केले. याकामी प्रांताधिकारी अश्विनी जिरंगे, तहसीलदार सचिन गिरी यांनी लक्ष केंद्रित केले. पोलीस खात्यामार्फत चोख व्यवस्था ठेवण्यात आली होती. राज्य परिवहन विभागामार्फत जादा एसटी वाहनांची सुविधा उपलब्ध करून देण्यात आल्याचेही प्रांताधिकारी अश्विनी जिरंगे यांनी सांगितले.