कोल्हापुरातील पाणीपुरवठा दुसऱ्या दिवशीही ठप्पच; पाण्यासाठी नागरिकांसह भाजप कार्यकर्ते रस्त्यावर

दरम्यान, गणपतीची प्रतिष्ठापना झाली तरी पाणीपुरवठा होत नसल्याने नागरिकांचा संयम सुटला आहे. आज पुन्हा शहरात जागोजागी आंदोलन सुरू झाले आहेत. भाजपने मिरजकर तिकटी परिसरात आंदोलन केले आहे.

ऐन गणेश उत्सवात कोल्हापूर शहराचा पाणीपुरवठा विस्कळीत झाला आहे. पाणीपुरवठ्यातील दोष निराकरण करण्यात कोल्हापूर महापालिकेच्या पाणीपुरवठा विभागाला अपयश आले आहे. यामुळे पुणे महापालिकेशी संपर्क साधून अद्ययावत तंत्रज्ञान व तंत्रज्ञ यांना निमंत्रित केले आहे.

तांत्रिक दोष कायम

या पथकाने काम सुरू केले आहे. पहाटे चार वाजेपर्यंत दुरुस्तीचे प्रयत्न सुरू होते. त्यामध्ये पुन्हा तांत्रिक दोष उद्भवला. अन्य अभियंता पाचारण करण्यात आले. अद्यापही दोष दुरुस्ती झालेली नसल्याने पाणीपुरवठा विस्कळीत आहे.

आजही टँकरवरच भिस्त

यामुळे टँकरद्वारे पाणीपुरवठा होणार असल्याचे आज महापालिकेने जाहीर केले आहे. यासाठी महापालिकेने बुधवार प्रमाणेच नियोजन केले आहे. अतिरिक्त आयुक्त, उपायुक्त, सहा. आयुक्त, इतर अधिकारी टँकर वितरणाच्या कामावर उपस्थित होते.

पोलीस बंदोबस्तात पाणी वितरण

शहरातील पाणीटंचाई लक्षात घेऊन महापालिकेचे व खासगी टँकरद्वारे पाणीपुरवठा सुरू करण्यात आला आहे. यासाठी ३२ टँकरची व्यवस्था करण्यात आली असून, त्यांची क्षमता साधारण १० ते ३० हजार लिटरपर्यंत आहे. पोलीस बंदोबस्त ठेवून टँकरद्वारे पाणी वितरण करण्यात आले.

रास्ता रोको आंदोलन

महालक्ष्मी मंदिर परिसरात पाणीपुरवठ्याचे तीन तेरा वाजल्याने आज भाजप मंडल चिटणीस रश्मी श्रीनिवास साळोखे यांच्या नेतृत्वाखाली मिरजकर तिकटी परिसरात रास्ता रोको आंदोलन करण्यात आले. शहराच्या चार भागांमध्ये आज रास्ता रोको करण्यात आल्याने वाहतूक विस्कळीत झाली होती. आंदोलकांनी कोल्हापूर महापालिकेच्या भोंगळ पाणी पुरवठ्याच्या विरोधात घोषणाबाजी केली.