जेम्स पॅटिन्सनने पुनरागमन झोकात साजरे करताना पाच बळी घेण्याची किमया साधली. त्यामुळे होबार्टच्या पहिल्या कसोटी सामन्यात तिसऱ्या दिवशीच ऑस्ट्रेलियाने विंडीजवर एक डाव आणि २१२ धावांनी दणदणीत विजय साजरा केला. वेस्ट इंडिजचा पहिला डाव सकाळच्या सत्रात २२३ धावांवर आटोपला. त्यामुळे ३६० धावांच्या आघाडीसह ऑसी कर्णधार स्टीव्ह स्मिथने विंडीजवर फॉलोऑन लादला. मग त्यांचा दुसरा डावसुद्धा फक्त १४८ धावांत गडगडला. दुसऱ्या डावात फक्त सलामीवीर क्रेग ब्रेथवेटने ९४ धावांची झुंजार खेळी साकारली. पहिल्या डावातील शतकवीर डॅरेन ब्राव्हो दुसऱ्या डावात फक्त ४ धावांवर बाद झाला. वेस्ट इंडिजने आतापर्यंतच्या २१ कसोटी सामन्यांपैकी फक्त चार सामने जिंकले आहेत.
