जागतिक बॅडमिंटन महासंघाने (बीडब्ल्यूएफ) मंगळवारी चीन मास्टर्स आणि हॉलंड खुली बॅडमिंटन स्पर्धा रद्द करण्याचा निर्णय जाहीर केला. करोनाच्या वाढत्या प्रादुर्भावामुळे २०२० मोसमाच्या वेळापत्रकातील आणखीन दोन महत्त्वाच्या स्पर्धा ‘बीडब्ल्यूएफ’ने रद्द केल्या आहेत. लिंगशुइ चीन मास्टर्स ही स्पर्धा याआधी २५ फेब्रुवारी ते १ मार्च या कालावधीत होणार होती. मात्र ती दोन वेळा लांबणीवर पडली. डच म्हणजेच हॉलंड खुली स्पर्धा ६ ते ११ ऑक्टोबर दरम्यान होणार होती. ‘‘करोनामुळे खेळाडूंच्या जीवाला उद्भवणारा वाढता धोका लक्षात घेता महासंघाने या स्पर्धा रद्द केल्या आहेत,’’ असे ‘बीडब्ल्यूएफ’ने सांगितले.
