टीम इंडियाचे माजी खेळाडू आणि समालोचक संजय मांजरेकर सध्या भारतीय चाहत्यांच्या रोषाचं कारण ठरत आहेत. विश्वचषकादरम्यान भारतीय खेळाडूंवर सतत टीका करणं यामुळे सोशल मीडियावर चाहते संजय मांजरेकर यांना ट्रोल करत आहेत. त्यातच रविंद्र जाडेजा संजय मांजरेकरांवर चांगलाच भडकला आहे. एका वृत्तसंस्थेशी बोलत असताना मांजरेकर यांनी जाडेजावर टीका केली होती. ही टीका सहन न झाल्याने जाडेजाने तितक्याच तीव्र शब्दांत मांजरेकरांना टोला लगावला आहे. "सध्या वन-डे क्रिकेटमध्ये रविंद्र जाडेजा जी भूमिका बजावतो आहे, अशा खेळाडूंचा मी फारसा चाहता नाहीये. कसोटी क्रिकेटमध्ये जाडेजा एक उत्तम गोलंदाज आहे. मात्र वन-डे क्रिकेटमध्ये मी त्याच्याऐवजी एक फलंदाज आणि एक फिरकीपटू संघात घेईन." मांजरेकर IANS वृत्तसंस्थेशी बोलत होते. या टिकेला रविंद्र जाडेजाने आपल्या ट्विटर अकाऊंटवरुन जशास तसं उत्तर दिलं आहे. Still i have played twice the number of matches you have played and i m still playing. Learn to respect ppl who have achieved.i have heard enough of your verbal diarrhoea.@sanjaymanjrekar— Ravindrasinh jadeja (@imjadeja) July 3, 2019 जेवढे सामने तू खेळला आहेस, त्याच्या दुप्पट सामने मी खेळलो आहे आणि अजुनही खेळतोय. अशा आशयाचा संदेश देत जाडेजाने मांजरेकरांना आपल्या टीकेचं लक्ष्य केलं आहे. मध्यंतरी मांजरेकर यांनी महेंद्रसिंह धोनी याच्या खेळावरही टीका केली होती.
