England vs India 3rd Test Live Updates : भारत विरूद्ध इंग्लंड कसोटी मालिकेतील तिसऱ्या कसोटीत आज पहिल्या दिवसअखेर भारताने ६ बाद ३०७ धावांपर्यंत मजल मारली. भारताचे पहिले तीन बळी लवकर बाद झाले. पण विराट कोहली आणि अजिंक्य रहाणे या जोडीने इंग्लिश गोलंदाजांची पुरेपूर धुलाई केली. विराटने ९७ तर अजिंक्यने ८१ धावा काढत भारताला मजबूत स्थितीत आणले. इंग्लंडकडून पहिल्या दिवशी ख्रिस वोक्सने ३, तर जेम्स अँडरसन आणि स्टुअर्ट ब्रॉड यांनी प्रत्येकी १-१ बळी टिपला. सध्या मैदानावर नवोदित ऋषभ पंत २२ धावांवर खेळत आहे. या सामन्यात नाणेफेक जिंकून इंग्लंडच्या संघाने गोलंदाजीचा निर्णय घेतला. प्रथम फलंदाजी करताना भारताने चहापानापर्यंत भारताने ३ बाद १८९ धावा केल्या होत्या. दुसऱ्या पूर्ण सत्रात भारताने एकही गडी न गमावता १०७ धावा केल्या. भारताकडून कर्णधार विराट कोहली आणि उपकर्णधार अजिंक्य रहाणे यांनी दिडशतकी भागीदारी करत भारताला सुस्थितीत आणले. दोघांनीही आपली अर्धशतके पूर्ण केली. त्यानंतर अजिंक्यने खेळाचा वेग वाढवला. ८१ धावांवर खेळत असताना अजिंक्य बाद झाला. जमलेली जोडी फोडण्यात स्टुअर्ट ब्रॉडला आले. अॅलिस्टर कुकने स्लिपमध्ये त्याचा अत्यंत उत्तम झेल टिपला. त्यानंतर विराट आपले शतक साजरे करेल. अशी अपेक्षा होती. मात्र तो फिरकीपटू अदिल रशीदच्या चेंडूवर बाद झाला. त्याने ९७ धावा केल्या. त्यांनतर हार्दिक पांड्या १८ धावांवर बाद झाला आणि त्याबरोबरच दिवसाचा खेळ थांबवण्यात आला. तत्पूर्वी भारताने उपहारापर्यंत ३ बाद ८२ अशी मजल मारली होती. पहिल्या सत्रात लोकेश राहुल आणि शिखर धवन या सलामीवीरांनी अर्धशतकी भागीदारी केली. पण त्यानंतर लगेचच शिखर धवन ३५ धावांवर तर लोकेश राहुलदेखील २३ धावांवर बाद झाला. काही वेळ खेळपट्टीवर तग धरल्यानंतर मोठा फटका मारण्याच्या नादात चेतेश्वर पुजाराही १४ धावांवर बाद झाला. हे तीनही बळी वेगवान गोलंदाज ख्रिस वोक्स याने टिपले. दरम्यान, इंग्लंडच्या संघात बेन स्टोक्सला सॅम कुरानच्या जागी संधी देण्यात आली आहे. तर भारताच्या संघात सलामीवीर शिखर धवन, यष्टीरक्षक रिषभ पंत आणि वेगवान गोलंदाज जसप्रीत बुमरा यांना स्थान देण्यात आले आहे. मुरली विजय, दिनेश कार्तिक आणि कुलदीप यादव यांना संघातून वगळण्यात आले आहे. पहिल्या दोन कसोटीत पराभव स्विकारावा लागल्यानंतर तिसऱ्या कसोटीआधी भारताचा यष्टीरक्षक दिनेश कार्तिक याच्या बोटाला दुखापत झाली. त्यामुळे त्याच्या जागी संघात ऋषभ पंत याला संधी देण्यात आली आहे. Here's our Playing XI for the 3rd Test. pic.twitter.com/TbgCCrtakP — BCCI (@BCCI) August 18, 2018