23 September 2020

News Flash

IPL 2019 : मुंबईच्या ‘हिटमॅन’ने मोडला ‘कॅप्टन कूल’चा विक्रम

रोहितने ६७ धावांच्या खेळीत लगावले ६ चौकार आणि ३ षटकार

IPL 2019 CSK vs MI : मुंबईच्या संघाने शुक्रवारी चेन्नईवर ४६ धावांनी सहज विजय मिळवला. कर्णधार रोहित शर्माच्या अर्धशतकी (६७) खेळीच्या जोरावर मुंबईने चेन्नईपुढे १५६ धावांचे आव्हान ठेवले. पण या आव्हानाचा पाठलाग करताना चेन्नईला केवळ १०९ धावाच करता आल्या. या विजयामुळे मुंबईचा संघ गुणतालिकेतील दुसऱ्या स्थानी पोहोचला.

IPL 2019 : चेन्नईला पराभवाचा दणका देत मुंबईनं रचला इतिहास

या सामन्यात अर्धशतकी खेळी करणाऱ्या रोहित शर्माला सामनावीर म्हणून गौरविण्यात आले. रोहितने ४८ चेंडूत ६ चौकार आणि ३ षटकारांच्या मदतीने ६७ धावा केल्या. या सामन्यात मिळालेला सामानावीराचा पुरस्कार हा त्याचा IPL मधील १७ वा सामनावीर पुरस्कार ठरला. या बरोबरच IPL मध्ये सर्वाधिक सामनावीर पुरस्कार पटकावणाऱ्या भारतीय खेळाडूंच्या यादीत रोहित शर्मा अव्वल ठरला. रोहितने महेंद्रसिंग धोनी आणि युसूफ पठाण यांचा विक्रम मोडला. या दोघांनीही १६ वेळा हा पुरस्कार मिळवला.

दरम्यान, मुंबईने दिलेल्या १५६ धावांच्या आव्हानाचा पाठलाग करताना सलामीवीर शेन वॉटसनने ३ चेंडूत २ चौकार लगावत तडाखेबाज सुरुवात केली होती, पण पुढच्याच चेंडूवर तो बाद झाला. मलिंगाने त्याला चतुर गोलंदाजी करत माघारी धाडले. धोनीच्या जागी नेतृत्वाची जबाबदारी सोपवण्यात आलेला कर्णधार सुरेश रैना केवळ २ धावा करून झेलबाद झाला आणि चेन्नईला दुसरा धक्का बसला. उंच फटका मारताना तो माघारी परतला. प्रतिभावान फलंदाज अंबाती रायडू त्रिफळाचीत झाला. तो ३ चेंडू खेळला पण त्याला भोपळाही फोडता आला नाही. केदार जाधव खेळपट्टीवर स्थिरावत असताना त्याला कृणालने त्रिफळाचीत केले. केदारने ६ धावा केल्या. नव्या दमाच्या ध्रुव शोरे यांच्याकडून चेन्नईला अपेक्षा होत्या, पण तो मोठा फटका खेळताना झेलबाद झाला. तो ५ धावा काढून माघारी परतला.

एकीकडे गडी झटपट बाद होताना एकाकी झुंज देणारा मुरली विजय १२ व्या षटकात झेलबाद झाला. पहिल्या सहा फलंदाजांमध्ये दुहेरी धावसंख्या गाठणारा तो एकमेव फलंदाज ठरला. विजयने ३ चौकार आणि १ षटकार यांच्या साहाय्याने ३८ धावा केल्या. मिचेल सँटनर आणि ब्राव्हो यांच्यात भागीदारी होण्यास सुरुवात होतानाच ब्राव्हो झेलबाद झाला. त्यामुळे चेन्नईच्या अडचणी वाढल्या. ब्राव्हो २० धावांवर माघारी परतला. त्यानंतर कोणीही फलंदाज फार काळ खेळपट्टीवर स्थिरावला नाही.

चेन्नईला नमवून मुंबई ‘किंग’; ४६ धावांनी विजयी

त्याआधी पहिल्यांदा फलंदाजी करणाऱ्या मुंबईची सुरुवात चांगली झाली, मात्र मधल्या फळीतल्या फलंदाजांनी निराशा केल्यामुळे मुंबईला मोठी झेप घेता आली नाही. मुंबईच्या सलामीवीरांनी आक्रमक सुरुवात करत आपले इरादे स्पष्ट केले होते. मात्र क्विंटन डी-कॉक लवकर माघारी परतला. यानंतर एविन लुईसच्या साथीने रोहितने मुंबईचा डाव सावरला. रोहितने ४८ चेंडूत ६ चौकार आणि ३ षटकारांच्या मदतीने ६७ धावा केल्या. त्याला साथ देणाऱ्या एविन लुईसने ३२ धावा केल्या. मात्र लुईस माघारी परतल्यानंतर मुंबईच्या मधल्या फळीतल्या फलंदाजांनी पुरती निराशा केली. आवश्यक धावगतीने खेळणं मुंबईच्या फलंदाजांना जमलं नाही.

मधल्या षटकांत चेन्नईच्या गोलंदाजांनी मुंबईच्या फलंदाजांवर अंकुश लावला. अखेरीस हार्दिक पांड्या आणि कायरन पोलार्ड यांनी मुंबईला १५५ धावांपर्यंत मजल मारुन दिली. चेन्नईकडून मिचेल सँटनरने २, तर दिपक चहर आणि इम्रान ताहीरने प्रत्येकी १-१ बळी घेतला.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on April 27, 2019 6:10 pm

Web Title: ipl 2019 csk vs mi mumbai indians captain rohit sharma breaks chennai super kings captain ms dhoni record
टॅग IPL 2019
Next Stories
1 IPL 2019 : चेन्नईविरुद्धच्या सामन्यात मलिंगा ठरला कर्दनकाळ, अनोख्या विक्रमाची नोंद
2 IPL 2019 : …म्हणून चेन्नईच्या संघात धोनी हवाच; Video पाहिल्यावर तुम्हालाही पटेल
3 IPL 2019 : मुंबईचा हिटमॅन ठरतोय चेन्नईच्या किंग्जची डोकेदुखी, जाणून घ्या…
Just Now!
X