News Flash

RR vs DC IPL 2021 : चुरशीच्या सामन्यात राजस्थानचा दिल्ली कॅपिटल्सवर विजय!

IPL 2021 च्या यंदाच्या मोसमातल्या सातव्या सामन्यामध्ये राजस्थान रॉयल्स विरुद्ध दिल्ली कॅपिटल्स एकमेकांसमोर उभे ठाकले. राजस्थानचा कर्णधार संजू सॅमसननं टॉस जिंकून क्षेत्ररक्षणाचा निर्णय घेतला. या

(संग्रहित छायाचित्र)

IPL 2021 च्या यंदाच्या मोसमातल्या सातव्या सामन्यामध्ये राजस्थान रॉयल्स विरुद्ध दिल्ली कॅपिटल्स एकमेकांसमोर उभे ठाकले. राजस्थानचा कर्णधार संजू सॅमसननं टॉस जिंकून क्षेत्ररक्षणाचा निर्णय घेतला. या सामन्याचं विशेष म्हणजे दोन्ही संघांचे कर्णधार हे पहिल्यांदाच आयपीएलमध्ये आपल्या टीमचं नेतृत्व करत आहेत. पहिल्या सामन्यात संजू सॅमसननं तडाखेबाज शतक झळकावलं होतं. मात्र, या सामन्यात राजस्थान रॉयल्सला पराभवाचा सामना करावा लागला होता. तर दुसरीकडे ऋषभ पंतच्या नेतृत्वातल्या दिल्लीच्या संघानं चेन्नई सुपर किंग्जच्या बलाढ्य संघाला पराभूत करण्याची करामत करून दाखवली आहे. मुंबईच्या वानखेडे स्टेडियमवर आयपीएलचा आजपर्यंतचा सरासरी स्कोअर १८२ आहे. पहिल्यांदा फलंदाजी करणारा संघ ४ वेळा जिंकला असून दुसऱ्यांदा फलंदाजी करणारा संघ ५ वेळा जिंकला आहे. त्यामुळे या सामन्यामध्ये दोन्ही संघांना बरोबरीची संधी असल्याचं मानलं जात आहे. पहिल्या डावाच्या शेवटी दिल्ली कॅपिटल्सनं राजस्थान रॉयल्ससमोर विजयासाठी १४८ धावांचं लक्ष्य ठेवलं.

विजयासाठी १४८ धावांचं आव्हान घेऊन मैदानात उतरलेल्या राजस्थान रॉयल्सनं सुरुवात सावध केली. पहिल्या २ ओव्हरमध्ये अवध्या ५ धावा राजस्थाननं केल्या. पण पुढच्या २ ओव्हरमध्ये राजस्थानच्या ३ विकेट्स पडल्या. तिसऱ्या ओव्हरच्या चौथ्या बॉलवर ख्रिस वोक्सनं दिल्लीला पहिली विकेट मिळवून दिली. ९ धावांवर मनन वोराला वोक्सनं रबाडाकरवी झेलबाद केलं. त्यानंतर ओव्हरच्या शेवटच्या चेंडूवर धोकादायक जोस बटलरला रिषभ पंतकरवी झेलबाद केलं. त्यामुळे राजस्थानला मोठा धक्का बसला. या धक्क्यातून राजस्थानची टीम सावरलीच नाही तोपर्यंत वोहराचा अप्रतिम झेल घेणाऱ्या रबाडाने गोलंदाजी करताना कर्णधार आणि पहिल्या सामन्यातील शतकवीर संजू सॅमसनचा मोठा अडथळा दूर केला. त्यामुळे राजस्थानची चौथ्याच षटकात १७ धावांवर ३ विकेट अशी अवस्था झाली.

डेविड मिलरनं शिवम दुबेला साथीला घेत राजस्थानच्या डावाला आकार द्यायला सुरुवात केली खरी. पण आठव्या षकात आवेश खानच्या गोलंदाजीवर शिखर धवनने स्लीपमध्ये शिवम दुबेचा झेल टिपला. २ धावांवर शिवम दुबे माघारी परतला. त्यापाठोपाठ रियान परागनं देखील राजस्थान रॉयल्सच्या चाहत्यांची निराशाच केली. एक बेजबाबदार फटका खेळताना पराग २ धावांवर झेलबाद झाला.

यानंतर आलेल्या राहुल तेवतियाला साथीला घेत डेविड मिलरनं राजस्थानचा डाव सावरला. या जोडीने १५व्या षटकापर्यंत राजस्थानला ९० धावांपर्यंत मजल मारून दिली. मात्र, रबाडाच्या गोलंदाजीवर फटका मारण्याच्या नादात राहुल तेवतिया १९ धावांवर बाद झाला. त्यानंतर डेविड मिलरनं गिअर बदलला. आपलं अर्धशतक पूर्ण करणारा डेविड मिलर राजस्थानला विजयापर्यंत घेऊन जाऊ शकतो, अशी आशा राजस्थानच्या चाहत्यांना वाटू लागली. आवेश खानने टाकलेल्या सोळाव्या ओव्हरमध्ये डेविड मिलरनं लागोपाठ दोन उत्तुंग षटकार खेचत टीमच्या आणि चाहत्यांच्या अपेक्षा रास्त असल्याचं देखील दाखवून दिलं. मात्र, त्यापुढचाच चेंडू आवेश खाननं वर टाकला आणि त्यावर चुकीचा फटका खेळून डेविड मिलरनं ललित यादवला सोपा झेल दिला.

दिल्ली कॅपिटल्सचा डाव…

टॉस हरल्यानंतर दिल्लीनं फलंदाजीला सुरुवात केली. पण सामन्याच्या दुसऱ्याच षटकामध्ये राजस्थान रॉयल्सचा जलदगती गोलंदाज जयदेव उनाडकटनं धोकादायक पृथ्वी शॉला माघारी धाडलं. अवघ्या ५ धावांवर पृथ्वी शॉला उनाकटनं डेविड मिलरकडे झेल देण्यासाठी भाग पाडलं आणि दिल्लीला पहिला झटका बसला! घरच्या मैदानावर खेळणारा पृथ्वी शॉ राजस्थानसाठी धोकादायक ठरू शकला असता, पण उनाडकटनं त्याचा अडथळा दुसऱ्याच षटकात बाजूला केला. त्यापाठोपाठ चौथ्या ओव्हरमध्ये पहिल्याच बॉलवर जयदेव उनाडकटनं दिल्लीचा दुसरा सलामीवीर शिखर धवनला बाद केलं. यष्टीरक्षक आणि राजस्थानचा कर्णधार संजू सॅमसननं शिखर धवनचा अफलातून झेल टिपला आणि दिल्लीला चौथ्या ओव्हरमध्ये दुसरा झटका बसला.

संजू सॅमसनची पुन्हा कमाल; शिखर धवनचा घेतला अफलातून झेल! व्हिडीओ व्हायरल

शिखर धवननंतर मैदानात उतरलेल्या संयमी अजिंक्य रहाणेकडून दिल्लीच्या चाहत्यांना मोठ्या अपेक्षा होत्या. मात्र, पुन्हा उनाडकटचा कठीण पेपर समोर आला आणि अजिंक्य रहाणेनं त्याच्याच गोलंदाजीवर त्यालाच सोपा झेल दिला. त्यामुळे ६ ओव्हर्सनंतर दिल्लीची अवस्था ३६ धावांवर ३ विकेट अशी झाली. उनाडकटपाठोपाठ मुस्तफिझूरनं देखील आपली करामत दाखवत धोकादायक मार्कस स्टॉयनिसला अप्रतिम बॉलवर मॉरिसकरवी झेलबाद केलं.

यानंतर आलेल्या ललित यादवला साथीला घेऊन कर्णधार रिषभ पंतनं डावाला आकार द्यायला सुरुवात केली. खराब चेंडूंवर प्रहार करतानाच एकेरी-दुहेरी धावा करत धावफलक हलता ठेवला. अवघ्या ३० चेंडूंमध्ये रिषभ पंतनं ५० धावा फटकावत दिल्लीचा स्कोअर १२ ओव्हर्सनंतर ८५ धावांपर्यंत पोहोचवला. मात्र, दिल्लीसाठी हा दिलासा फार काळ टिकला नाही. रियान परागनं आपल्याच बॉलिंगवर एकेरी धाव घेण्याच्या प्रयत्नात असलेल्या रिषभ पंतला धावचीत करून माघारी धाडलं. दिल्लीच्या अडचणी इतक्यावरच थांबल्या नाहीत. रिषभ पंतसोबत डाव सावरणारा ललित यादव २० धावांवर असताना मॉरिसच्या गोलंदाजीवर उत्तुंग फटका मारताना बाद झाला. राहुल तेवतियानं त्याचा अप्रतिम झेल टिपला!

RR vs DC : अप्रतिम पराग! भन्नाट थ्रोवर दिल्लीच्या कर्णधारालाच धाडलं मघारी!

शेवटच्या फलंदाजांनी केलेल्या छोट्या भागीदाऱ्यांच्या जोरावर दिल्ली कॅपिटल्सनं राजस्थान रॉयल्ससमोर विजयासाठी १४८ धावांचं लक्ष्य ठेवलं!

 

राजस्थान रॉयल्सला जोफ्रा आर्चर दुखापतग्रस्त असल्याने पहिल्या सामन्यात फटका बसला होता. आता अष्टपैलू बेन स्टोक्स दुखापतीमुळे आयपीएलमधून बाहेर गेला आहे.

 

दिल्ली कॅपिटल्समध्ये ललित यादवनं आजच्या सामन्यातून आयपीएलमध्ये पदार्पण केलं आहे.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on April 15, 2021 7:30 pm

Web Title: ipl 2021 rr vs dc match live toss win rajasthan royals delhi capital first batting pmw 88
टॅग : IPL 2021
Next Stories
1 दिल्लीविरुद्ध संजू सॅमसनची सिंहगर्जना! सोशल मीडियावर व्हिडिओ व्हायरल
2 IPL 2021: हैदराबादविरुद्धच्या भेदक गोलंदाजीचं सिराजनं गुपित केलं उघड
3 IPL 2021 : सनरायजर्सच्या पराभवानंतर ‘या’ तरुणीचे फोटो व्हायरल! कोण आहे ही तरुणी?
Just Now!
X