पोटरे अलेग्रे : पेरू संघाने गतविजेत्या चिलीचा ३-० असा धुव्वा उडवत तब्बल ४४ वर्षांनंतर कोपा अमेरिका फुटबॉल स्पर्धेच्या अंतिम फेरीत धडक मारली. एडिन्सन फ्लोरेस (२१व्या मिनिटाला), योशिमार योटून (३८व्या मिनिटाला) आणि पावलो गुरेरो (९०व्या मिनिटाला) यांनी गोल करत पेरूला विजय मिळवून दिला. आता रविवारी रंगणाऱ्या अंतिम फेरीत पेरूला ब्राझीलच्या आव्हानाला सामोरे जावे लागणार आहे. चिलीने २०१५ आणि २०१६मध्ये अर्जेटिनाला हरवून कोपा अमेरिका करंडकावर नाव कोरले होते. पण पेरूने चिलीची सुवर्णमय परंपरा मोडीत काढली.