Mohammed Shami Daughter Holi: ‘होळी खेळणे गुन्हा’, रमजानच्या टीकेनंतर मौलानाकडून आता मोहम्मद शमीची मुलगी लक्ष्य

रझवी म्हणाले, “मोहम्मद शमीची मुलगी लहान आहे. जर तिने अजाणतेपणी होळीत रंग उधळले असतील तर तो गुन्हा नाही. पण तिला समज असेल आणि ती जाणूनबुजून होळी खेळली असेल तर हा शरीयत नुसार गुन्हा आहे.” रझवी पुढे म्हणाले की, शमीला यापूर्वीही इस्लामच्या तत्त्वांचे पालन करण्याचा सल्ला दिला होता. पण तरीही त्याच्या मुलीचा होळी साजरा करतानाचा व्हिडीओ समोर आला आहे.

“मोहम्मद शमी आणि त्याच्या परिवाराला मी आवाहन केले होते की, जे शरीयतमध्ये नमूद केलेले नाही, त्यात तुमच्या मुलांना सहभागी करू नका. होळी हा हिंदूंचा निश्चितच मोठा सण आहे. पण मुस्लीम लोकांनी होळीपासून दूर राहिले पाहिजे. जर शरीयतचा कायदा माहीत असूनही जर कुणी होळी खेळत असेल तर तो गुन्हा ठरतो”, अशी प्रतिक्रिया मौलाना रझवी यांनी दिली आहे.

याशिवाय रझवींनी मोहम्मद शमीवर रोजा न पाळल्याबद्दल टीका केली होती. पण भारतीय संघाने चॅम्पियन्स ट्रॉफी जिंकल्यानंतर त्यांनी संघाचे कौतुक केले आहे. मी टीम इंडियाचे अभिनंदन व्यक्त करतो. तसेच मोहम्मद शमीलाही मनापासून शुभेच्छा देतो, असे मौलाना रझवी म्हणाले.

काही दिवसांपूर्वीच मौलाना रझवींनी शमीवर टीका केली होती. ते म्हणाले होते, “इस्लाममध्ये रोझा पाळणे हे कर्तव्य आहे. एखादी व्यक्ती जाणून बुजून रोजा पाळत नसेल तर तो अट्टल गुन्हेगार आहे. मोहम्मद शमीने रोजा पाळला नाही. मुळात ते त्याचे कर्तव्य आहे. रोजा न पाळून मोहम्मद शमीने मोठा गुन्हा केला. शरीयतच्या नियमानुसार तो मोठा गुन्हेगार आहे. त्याला आता माफी मागावी लागेल.”