Australia Women vs South Africa Women T20 WC Final Match: आयसीसी महिला टी-२० विश्वचषक २०२३ स्पर्धेतील फायनल सामना रविवारी पार पडला. केपटाऊनच्या न्यूलँड्स मैदानावर खेळल्या गेलेल्या सामन्यात ऑस्ट्रेलिया संघाने दक्षिण आफ्रिकेवर १९ धावांनी विजय मिळला. त्याचबरोबर सलग तिसऱ्यादा आणि एकूण सहाव्यांदा महिला टी-२० विश्वचषकावर आपले नाव कोरले.
प्रथम फलंदाजी करताना ऑस्ट्रेलिया संघाने ६ बाद १५६ धावा केल्या होत्या. त्यामुळे दक्षिण आफ्रिकेला १५७ धावांचे लक्ष्य मिळाले होते. प्रत्युत्तरात दक्षिण आफ्रिकेचा संघ निर्धारित २० षटकांत ६ बाद १३७ धावा करु शकला. त्यामुळे त्यांचे पहिल्यांदा विश्वचषक जिंकण्याचे स्वप्न अपूर्ण राहिले. एल वोल्वार्डने ४८ चेंडूत ६१ धावा केल्या. १७व्या षटकात ती बाद होताच दक्षिण आफ्रिकेच्या आशाही संपुष्टात आल्या.
१५७ धावांचा पाठलाग करायला उतरलेल्या दक्षिण आफ्रिका संघाची सुरुवात खराब झाली. तझमिन ब्रिट्स १०(१७) काढून बाद झाली. त्यानंतर दुसरा मारिझान कॅप ११(११) आणि तिसरा धक्का कर्णधार सुने लुसच्या २(५) बाद होण्याने बसला. त्यानंतर लॉरा वोल्वार्ड आणि क्लो ट्रायॉनने संघाचा डाव सावरण्याचा प्रयत्न केला. या दोघींनी चौथ्या विकेटसाठी ५५ धावांची भागीदारी केली.
आयसीसी स्पर्धेत दुसऱ्यांदा विजेतेपदाची हॅट्ट्रिक –
ऑस्ट्रेलियन संघ यापूर्वी २०१०, २०१२, २०१४, २०१८ आणि २०२० मध्ये चॅम्पियन बनला आहे. ऑस्ट्रेलियन संघाने दुसऱ्यांदा महिला टी-२० विश्वचषकात विजेतेपदाची हॅट्ट्रिक केली आहे. यापूर्वी या संघाने २०१०, २०१२ आणि २०१४मध्ये सलग तीन वेळा विजेतेपद पटकावले होते. त्याच वेळी, आता २०१८ , २०२० आणि २०२३ मध्ये विजेतेपद पटकावले आहेत. प्रथमच, एखाद्या संघाने पुरुष किंवा महिला क्रिकेटसह आयसीसी स्पर्धेत दुसऱ्यांदा विजेतेपदाची हॅट्ट्रिक केली आहे.
नाणेफेक जिंकून प्रथम फलंदाजी करताना. ऑस्ट्रेलियाने चांगली सुरुवात केली. एलिसा हिली आणि बेथ मुनी यांनी पहिल्या विकेटसाठी ३६ धावांची भागीदारी केली. हीलीला २० चेंडूत १८ धावा करता आल्या. यामध्ये तीन चौकारांचा समावेश आहे.
यानंतर अॅशले गार्डनरने मुनीसोबत दुसऱ्या विकेटसाठी ४६ धावांची भागीदारी केली. २१ चेंडूत २९ धावा करून गार्डनर क्लो ट्रायॉनच्या गोलंदजीवर झेलबाद झाली. आपल्या खेळीत तिने दोन चौकार आणि दोन षटकार मारले. ग्रेस हॅरिस नऊ चेंडूत १० धावा करून बाद झाली आणि कर्णधार मेग लॅनिंगने ११ चेंडूत १० धावा केल्या. एलिस पेरी पाच चेंडूंत सात धावा करून पॅव्हेलियनमध्ये परतली. दरम्यान, बेथ मुनीने अर्धशतक झळकावले. दोन विश्वचषक फायनलमध्ये अर्धशतके झळकावणारी ती जगातील पहिली महिला खेळाडू ठरली.
हेही वाचा – AUSW vs SAW: बेथ मुनीने फायनल सामन्यात रचला इतिहास; ‘ही’ कामगिरी करणारी ठरली पहिली खेळाडू
अखेरच्या षटकात शबनीम इस्माईलने चौथ्या चेंडूवर एलिस पेरीला आणि पाचव्या चेंडूवर वेरेहमला बाद केले. तिला हॅट्ट्रिकची संधी होती, पण ताहिल मॅकग्राने शेवटच्या चेंडूवर एकच धाव घेतली. अशाप्रकारे शबनिमची हॅटट्रिक हुकली. बेथ मुनीने ५३ चेंडूंत नऊ चौकार आणि एका षटकाराच्या मदतीने नाबाद ७४ धावा केल्या. दक्षिण आफ्रिकेकडून मारिजाने कॅप आणि शबनिम इस्माइलने प्रत्येकी दोन गडी बाद केले. त्याचवेळी मलाबा आणि ट्रायॉन यांना प्रत्येकी एक विकेट मिळाली.
