VIDEO: “आज माझे आणि आईचे स्वप्न साकार…”; टीम इंडियाच्या फ्लाईटमध्ये बसताच रिंकू सिंगने केला आईला कॉल

आयपीएलमध्ये खळबळ माजवलेल्या रिंकू सिंगलाही या दौऱ्यात संधी मिळाली आहे. त्याने एका मुलाखतीत सांगितले की, विमानातील बिझनेस क्लासमध्ये टीम इंडियाच्या जर्सीत बसणे अभिमानाची गोष्ट आहे. त्याचबरोबर रिंकूने विमानात बसून आईशी संवाद साधला. ज्यामध्ये त्याने आपले आणि आईचे स्वप्न साकार झाल्याचे सांगितले.

भारत शुक्रवारपासून डब्लिनमध्ये तीन सामन्यांच्या टी-२० मालिकेला सुरुवात करणार आहे. या सामन्यापूर्वी बीसीसीआयने आपल्या ट्विटर हँडलवर रिंकू सिंग आणि युवा यष्टीरक्षक फलंदाज जितेश शर्मा यांच्यासोबतच्या खास चॅटचा व्हिडिओ शेअर केला आहे. या व्हिडिओमध्ये रिंकू सिंगने सांगितले की, भारतासाठी खेळणे हे त्याचे आणि आईचे खास स्वप्न होते, जे आता पूर्ण होताना दिसत आहे.

या व्हिडिओमध्ये रिंकू सिंगला विमानतळावर प्रवेश करण्यापासून ते फ्लाइटमध्ये चढण्यापर्यंत आणि नंतर आयर्लंडच्या थंड वातावरणात सराव करताना दाखवण्यात आले आहे. या मुलाखतीत जितेश एका अँकरची भूमिका साकारत आहे, जो रिंकू सिंगला आयपीएलचा सुपरस्टार म्हणून संबोधतो. यानंतर, तो त्यांना विचारतो की बिझनेस क्लासमध्ये बसून टीम इंडियाची जर्सी घालून परदेशात पोहोचणे कसे वाटते.

हेही वाचा – IND vs IRE T20: भारत आणि आयर्लंड मालिकेतील सामने, जाणून घ्या विनामूल्य कुठे आणि कधी पाहू शकता?

यावर उत्तर देताना रिंकू सिंग म्हणाला, “मला खूप बरे वाटत आहे आणि भारतासाठी खेळणे हे प्रत्येक खेळाडूचे स्वप्न असते. फ्लाइटमध्ये बसल्यावर मी आईला फोन केला. कारण माझ्या मुलाने भारतासाठी खेळावे असे आईचेही स्वप्न होते आणि आज तिचे आणि माझे स्वप्न पूर्ण होत आहे.” यानंतर रिंकू सिंगने आयर्लंडच्या थंड वातावरणात सराव करण्यावर प्रतिक्रिया देताना म्हणाला की, थोडी-थोडी थंडी लागत आहे आणि या हवामानात सराव करणे खूप चांगले आहे. भारतीय संघाने आपल्या युवा खेळाडूंना या दौऱ्यावर पाठवले आहे. रिंकू सिंग आणि जितेश शर्मा यांनाही येथे पदार्पण करण्याची संधी मिळू शकते.