कार्लोस अल्कराझ, श्वीऑटेकची आगेकूच

पुरुष एकेरीत अल्कराझने विजय मिळविला असला, तरी त्याला एक सेट गमवावा लागला. अल्कराझने फॅबिअन मारोझसानचे आव्हान ६-१, ४-६, ६-१, ६-२ असे परतवून लावले. पुरुष एकेरीत पोर्तुगालच्या नुनो बोर्जेसने दुसऱ्या फेरीत सर्वात सनसनाटी निकालाची नोंद करताना नॉर्वेच्या कॅस्पर रूडचा २-६, ६-४, ६-१, ६-० असा पराभव केला. इटलीच्या आठव्या मानांकित लॉरेन्झो मुसेट्टीने डॅनिएल गुलानचा ६-४, ६-०, ६-४ असा पराभव केला.

महिला एकेरीत श्वीऑटेकने २०२१च्या अमेरिकन विजेत्या एमा रॅडुकानूवर ६-१, ६-२ अशी सहज मात केली. चीनच्या पॅरिस ऑलिम्पिक विजेत्या क्विनवेन झेंग हिने आपली आगेकूच कायम राखताना एमिलिआना अॅरांगोचा ६-२, ६-३ असा सहज पराभव केला. चौथ्या मानांकित जॅस्मिन पाओलिनीने आयला टोमयानोविच हिचे आव्हान ६-३, ६-३ असे परतवून लावले.

युकी, बोपण्णाची विजयी सलामी

भारताच्या युकी भांबरीने अमेरिकेच्या रॉबर्ट गॅलोवेच्या साथीत पुरुष दुहेरीत विजय मिळविला. युकी-रॉबर्ट जोडीने रॉबिन हॅसे-हेन्ड्रिक जेबेन्सचे आव्हान ६-३, ६-७(८-१०), ६-३ असे परतवून लावले. रोहन बोपण्णा व चेक प्रजासत्ताकच्या अॅडम पावलासेक जोडीने अमेरिकेच्या रॉबर्ट कॅश व जेम्स ट्रेसी जोडीला ७-६ (८-६), ५-७, ६-१ असे पराभूत केले.