Makhaya Ntini on Virat Kohli: विराट कोहलीची आक्रमक शैली सर्वांनाच माहिती आहे. मैदानावर असे अनेक सामने झाले आहेत ज्यात गोलंदाज काही बोलला की कोहलीने त्याला बॅटने जोरदार उत्तर दिले आहे. कोहलीच्या या शैलीबाबत दक्षिण आफ्रिकेचा माजी अनुभवी खेळाडू मखाया अ‍ॅनटिनीने गोलंदाजांना आवश्यक सल्ला दिला आहे. तो म्हणतो की, “सामन्यादरम्यान कोहलीला काहीही बोलू नका, त्याला बाद करण्याचा हाच एक मार्ग आहे.”
रेव स्पोर्ट्सला दिलेल्या मुलाखतीत दक्षिण आफ्रिकेचा माजी गोलंदाज अ‍ॅनटिनी म्हणाला, “मी तुम्हाला विराट कोहलीबद्दल काही महत्त्वाच्या गोष्टी सांगणार आहे. मी हे दक्षिण आफ्रिकेच्या गोलंदाजाला सांगू इच्छितो जो त्याच्याकडे गोलंदाजी करेल. जेव्हा तो (कोहली) फलंदाजी करतो तेव्हा त्याला एक शब्दही बोलू नका. मी हे पुन्हा सांगतो की, त्यांना काहीही बोलून, स्लेज करू नका. जर तुम्ही असे केले तर तो त्याचा वचपा काढल्याशिवाय राहणार नाही. जर तुम्ही त्याला ओळखत असाल तरच त्याला स्लेजिंग आवडते. नाहीतर तो त्या गोलंदाजामागे हात धुवून लागतो. कोणीतरी त्याला स्लेजिंग करावे हाच प्रकार त्याला आवडतो.”
अ‍ॅनटिनी पुढे म्हणाला की “जर सतत तुम्ही असे स्लेजिंग करत राहिल्यास तो त्याचे इसिप्त साध्य करेल. तुम्ही त्याला जे हवे आहे ते देत आहात. त्यामुळे माझा सल्ला असा आहे की, त्याच्या विरोधात गप्प बसा. कोहलीविरुद्ध स्लेजिंग करू नका, तो कंटाळा येऊन आपोआप बाद होईल.”
कोहलीला स्लेजिंग न करणे, त्याला बाद करण्याचा सर्वोत्तम मार्ग आहे- मखाया अ‍ॅनटिनी
कोहलीच्या आक्रमकतेबद्दल बोलताना अ‍ॅनटिनी म्हणाला की, “विराट विरुद्ध स्लेजिंग केलं नाही तर तो आपोआप कंटाळा येऊन बाद होऊ शकतो.” तो पुढे म्हणाला की, “जेव्हा तो पाहतो की गोलंदाज काहीही बोलत नाही, तेव्हा त्याला कंटाळा येईल. त्याचे सर्वोत्तम प्रदर्शन करण्यासाठी त्याला मध्यभागी काहीतरी चार्जअप होण्यासाठी गरजेचे असते. जेव्हा त्याला काही मिळत नाही, तेव्हा त्याला कंटाळा येईल आणि तेव्हाच ते चुका करेल. त्याच्यासमोर खेळाडूंनी हुशार असणे गरजेचे आहे. तुम्ही इतर फलंदाजांसोबत जसं करता तसं त्याच्यासमोर करू नका.”
अ‍ॅनटिनीने वर्ल्डकप २०२३चे सर्वोतम चार संघ निवडले
अ‍ॅनटिनीने उपांत्य फेरीत जाण्यासाठी आपले चार आवडते संघ निवडले आहेत. तो म्हणाला, “माझे सर्वोतम चार सेमीफायनल जाणारे संघ दक्षिण आफ्रिका, भारत, ऑस्ट्रेलिया आणि पाकिस्तान हे आहेत. दक्षिण आफ्रिकेसाठी विश्वचषक जिंकण्याची ही उत्तम संधी आहे.” तो पुढे म्हणाला, “मला वाटते की या विश्वचषकात दक्षिण आफ्रिकेकडे ट्रॉफी घरी आणण्याची चांगली संधी आहे. दक्षिण आफ्रिकेचे अनेक खेळाडू आयपीएल खेळतात आणि भारतीय परिस्थितीत दोन महिन्यांहून अधिक काळ घालवतात. या खेळपट्ट्या त्याच्यासाठी अनोळखी नाहीत. खेळपट्टीकडून काय अपेक्षा करावी आणि आव्हानांचा सामना कसा करावा, हे त्यांना माहीत आहे. दक्षिण आफ्रिकेच्या या संघात खूप प्रतिभा आहे.”
