Fifa World Cup 2022 Final: लिओनेल मेस्सीची क्रेझ! अर्जेंटिनाच्या जर्सीची जगभरात वाढली मागणी, अनेक देशांमध्ये संपला साठा

फायनलपूर्वी अर्जेंटिनाच्या जर्सीला जगभरातून प्रचंड प्रमाणात मागणी वाढली आहे. जर्सी निर्माता आदिदासने एका निवेदनात म्हटले आहे की, सध्या जगात अर्जेंटिना संघाची जर्सी खरेदी करण्याची लोकांमध्ये क्रेझ आहे, परिस्थिती अशी आहे की काही देशांमध्ये स्टॉक जवळजवळ संपला आहे.

रॉयटर्सच्या वृत्तानुसार, आदिदासच्या प्रवक्त्याने माहिती दिली आहे की, जगभरात अर्जेंटिनाच्या जर्सी आणि किट्सच्या मागणीत अचानक वाढ झाली आहे. त्यामुळे काही ठिकाणी साठा कमी झाला आहे. कोठेही साठा संपू नये यासाठी आम्ही सातत्याने प्रयत्न करत आहोत.

अदिदास अर्जेंटिनाचा अधिकृत प्रायोजक आहे. तो जगातील सर्वात मोठा स्पोर्ट्स ब्रँड देखील आहे. अशा परिस्थितीत त्याच्या जर्सी आणि किटला जगभरातून खूप मागणी आहे. कंपनीचे म्हणणे आहे की, २०१८ च्या रशिया विश्वचषकापेक्षा यावेळी अधिक मागणी आहे, जी सुमारे ३० टक्क्यांनी वाढली आहे.

हेही वाचा – Fifa WC 2022 Final: मेस्सी आणि एमबाप्पे यांच्यात आज रोमांचक लढत; जाणून घ्या अंतिम सामना कधी आणि कुठे पाहता येईल

जर्मनी विश्वचषकातून बाहेर पडल्यामुळे कंपनीच्या विक्रीत घट होईल, अशी भीती बाजारात होती, मात्र तसे झाले नाही. विश्वचषकादरम्यान कंपनीने सुमारे ४२५ दशलक्षची विक्री केली आहे. वर्ल्ड कपमध्ये सात संघ असे होते, ज्यांचे प्रायोजक अदिदास होते. त्यापैकी ३ संघ बाद फेरीत पोहोचले होते.