Video: ख्रिस्तियानो रोनाल्डोचे स्वप्न भंगताच अश्रू अनावर; तो कधीच विश्वचषक ट्रॉफी उचलू शकणार नाही का?

३७ वर्षीय ख्रिस्तियानो रोनाल्डो आपला पाचवा विश्वचषक खेळत होता. मोरोक्कोने उपांत्यपूर्व फेरीत पोर्तुगालचा १-० असा धुव्वा उडवत प्रथमच फिफा विश्वचषकाच्या उपांत्य फेरीत प्रवेश केला. मोरोक्कोने फिफा विश्वचषकाच्या अंतिम चारमध्ये पोहोचणारा पहिला आफ्रिकन आणि अरब देश बनण्याचा मान मिळवला. अल थुमामा स्टेडियमवर जागतिक क्रमवारीत २२व्या स्थानावर असलेल्या मोरोक्कोसाठी युसेफ एन नेसरीने ४२व्या मिनिटाला सामन्यातील निर्णायक गोल केला.

रोनाल्डोला आवरता आले नाहीत अश्रू –

पोर्तुगाल वर्ल्डकपमधून बाहेर पडल्यानंतर ख्रिस्तियानो रोनाल्डोला आपल्या भावनांवर नियंत्रण ठेवता आले नाही. मैदानाबाहेर जाताना रोनाल्डोच्या डोळ्यातून अश्रू वाहू लागले. आता विश्वचषक जिंकण्याचे त्याचे स्वप्न पूर्ण होणार नाही हे कदाचित रोनाल्डोला चांगलेच ठाऊक असेल. त्याच्या कारकिर्दीतील हा शेवटचा विश्वचषक ठरू शकतो. रोनाल्डोचा हा भावनिक व्हिडिओ सोशल मीडियावर व्हायरल झाला आहे.

रोनाल्डोची वर्ल्डकपमधील सुरुवात वादानेच झाली होती –

हेही वाचा – World Cup: कर्णधाराच्या एका चुकीमुळे इंग्लंडचा खेळ खल्लास… शेवटच्या मिनिटांत सामना २-१ च्या फरकाने जिंकत फ्रान्स उपांत्य फेरीत

मोरोक्कोविरुद्धच्या सामन्यातही रोनाल्डोला सुरुवातीच्या इलेव्हनमध्ये स्थान देण्यात आले नव्हते. त्याच्या जागी युवा फुटबॉलपटू गोन्सालो रोमोसला सुरुवातीच्या इलेव्हनमध्ये संधी मिळाली होती. रोमोस तोच खेळाडू आहे, ज्याने स्वित्झर्लंडविरुद्ध प्री क्वार्टर फायनलमध्ये ३ गोल केले होते. मात्र, उपांत्यपूर्व फेरीत त्याला प्रभाव पाडणारी कामगिरी करता आली नाही. कतार फिफा विश्वचषक रोनाल्डोसाठी पटकन विसरण्यासारखा होता. विश्वचषकात रोनाल्डोचा प्रवेश क्लबसोबतच्या वादाने सुरु झाला होता.