FIFA World Cup 2022 : नेदरलँड्सची विजयी सलामी; सेनेगलवर मात

वृत्तसंस्था, दोहा : आघाडीपटू कोडी गाकपो आणि डेवी क्लासेनने दुसऱ्या सत्रात नोंदवलेल्या निर्णायक गोलच्या बळावर चुरशीच्या झालेल्या विश्वचषक फुटबॉल स्पर्धेतील सामन्यात नेदरलँड्सने सोमवारी सेनेगलवर २-० असा विजय मिळवला. सामन्याच्या सुरुवातीपासून दोन्ही संघांमध्ये चांगली चुरस पहायला मिळाली. नेदरलँड्सने प्रथम सेनेगलच्या बचावावर आक्रमण केले, मात्र सेनेगलच्या बचाव फळीने ते परतवून लावले. यानंतर पहिल्या सत्रात नेदरलँड्सने गोल करण्याचे अनेक प्रयत्न केले. मात्र, त्यांना यश मिळाले नाही. सेनेगलचेही आघाडी घेण्यासाठी प्रयत्न सुरू होते, परंतु त्यांच्या पदरीही निराशा आली. त्यामुळे मध्यंतरापर्यंत सामना गोलशून्य बरोबरीत होता.