अ‍ॅटलेटिकोची जेतेपदाच्या दिशेने कूच

पराभवाच्या कटू आठवणी पुसायच्या आहेत : सिल्वा
पॅरिस : फ्रान्सकडून १९९८ च्या विश्वचषक फुटबॉल स्पर्धेतील अंतिम लढतीत झालेल्या पराभवाच्या आठवणी पुसायच्या आहेत व त्यासाठी आगामी चॅम्पियन्स फुटबॉल लीग स्पर्धेत विजेतेपद मिळवायचे आहे, असे ब्राझील संघाचा संभाव्य कर्णधार व पॅरिस सेंट जेर्मन संघाचा खेळाडू थिएगो सिल्वा याने सांगितले. फ्रान्स आंतरराष्ट्रीय स्टेडियमवर विश्वचषकाची अंतिम लढत गमावणाऱ्या ब्राझील संघात त्या वेळी सिल्वाचा सहभाग नव्हता मात्र येथे होणाऱ्या लीग स्पर्धेत या पराभवाची परतफेड मला करायची आहे. माझ्या वरिष्ठ खेळाडूंना येथील स्टेडियमवर झिनेदीन झिदानच्या दोन गोलांमुळे पराभवास सामोरे जावे लागले होते. या पराभवाची सल अजूनही आमच्या वरिष्ठ खेळाडूंना वाटत आहे. आता माझ्यावर त्यांचे दु:ख हलके करण्याची जबाबदारी आहे. त्यासाठी मला पॅरिस सेंट जेर्मन संघाविरुद्ध विजय मिळवावा लागणार आहे, असे सिल्वा याने सांगितले. सिल्वा हा मधल्या फळीतील अव्वल दर्जाचा खेळाडू मानला जातो. त्याने आतापर्यंत अनेक स्पर्धामध्ये चमकदार कामगिरी केली आहे. सिल्वाच्या संघास परगावच्या सामन्यात चेल्सा संघाकडून हार स्वीकारावी लागली होती. चॅम्पियन्स लीगमध्ये अजिंक्यपद मिळविण्यासाठी आम्हाला खूप कष्ट घ्यावे लागणार आहेत, याची आम्हाला पूर्ण कल्पना आहे व त्यासाठी आम्ही चांगली तयारीही केली आहे, असेही सिल्वाने सांगितले. सिल्वाने २०१० च्या विश्वचषक स्पर्धेत ब्राझीलचे प्रतिनिधित्व केले होते. तसेच त्याने २००८ व २०१२ च्या ऑलिम्पिकमध्येही भाग घेतला होता. लंडन येथील ऑलिम्पिकमध्ये सिल्वाच्या नेतृत्वाखाली ब्राझील संघास अंतिम लढतीत मेक्सिकोने हरविले होते.