Asia Cup मध्ये अन्य संघांतून भारताविरोधात खेळणारे भारतीय खेळाडू, वाचा संपूर्ण यादी

आशिया चषक २०२५ स्पर्धेसाठी भारत, पाकिस्तानसह, बांगलादेश, श्रीलंका, युएई, ओमान, अफगाणिस्तान आणि हाँगकाँग हे ८ संघ पात्र ठरले आहेत. या ८ पैकी ओमान, हाँगकाँग आणि युएई संघात १४ भारतीय वंशाचे खेळाडू खेळताना दिसणार आहेत. भारतात क्रिकेटचा स्तर खूप जास्त उंचावला आहे. त्यामुळे काही खेळाडूंना वर्षानुवर्षे चांगली कामगिरी करूनही संघात स्थान मिळत नाही. अशावेळी खेळाडू देश सोडून दुसऱ्या देशाकडून खेळण्याचा निर्णय घेतात.

आशिया चषक २०२५ स्पर्धेसाठी हाँगकाँगच्या संघात स्थान मिळालेला यष्टीरक्षक फलंदाज अंशुमन रथ हा मुळचा भारतीय आहे. अंशुमनने देशांतर्गत क्रिकेटमध्ये ओडिसा संघाचं प्रतिनिधित्व केलं आहे. यासह मुंबईकर किंचित शाह आणि आयुष शुक्ला यांचा देखील समावेश आहे. यासह भारतीय संघाविरूद्ध पहिला सामना खेळणाऱ्या युएईच्या संघात देखील ६ भारतीय वंशाच्या खेळाडूंचा समावेश करण्यात आला आहे. ज्यात अलीशान शराफू, राहुल चोपडा, आर्यंश शर्मा, ध्रुव पाराशर, हर्षित कौशिक आणि सिमरनजीत सिंग यांचा समावेश करण्यात आला आहे.

आशिया चषकासाठी ओमानचा संघ देखील जाहीर करण्यात आला आहे. ओमानच्या कर्णधारपदाची जबाबदारी भारतीय वंशाचा खेळाडू जतिंदर सिंहकडे सोपवण्यात आली आहे. या संघात भारतीय वंशाच्या विनायक शुक्ला, आशिष ओडेडरा, करन सोनावळे, आर्यन बिष्ट यांचा देखील समावेश करण्यात आला आहे. यासह ३ संघात भारतीय वंशातील १४ खेळाडू खेळताना दिसणार आहेत.

ओमान- विनायक शुक्ला, आशिष ओडेडरा, करन सोनावळे, आर्यन बिष्ट, जतिंदर सिंह

युएई– हर्षित कौशिक, ध्रुव पाराशर, आर्यंश शर्मा, राहुल चौप्रा, अलीशान शराफू, सिमरनजीत सिंग

हाँगकाँग– किंचिच शाह, आयुष शुक्ला, अंशुमन रथ