आंतरराष्ट्रीय जलतरण स्पर्धेसाठी भारताचा संघ जाहीर

इस्रायलमध्ये होणाऱ्या १८ वर्षांखालील गटाच्या आंतरराष्ट्रीय जलतरण स्पर्धेसाठी भारताच्या २४ खेळाडूंची निवड येथे करण्यात आली. त्यामध्ये पुण्याच्या अनन्या पाणिग्रही हिचा समावेश आहे. ही स्पर्धा ७ ते १२ एप्रिल या कालावधीत होणार आहे.

पुण्याच्या अनन्या पाणिग्रहीचा समावेश
इस्रायलमध्ये होणाऱ्या १८ वर्षांखालील गटाच्या आंतरराष्ट्रीय जलतरण स्पर्धेसाठी भारताच्या २४ खेळाडूंची निवड येथे करण्यात आली. त्यामध्ये पुण्याच्या अनन्या पाणिग्रही हिचा समावेश आहे. ही स्पर्धा ७ ते १२ एप्रिल या कालावधीत होणार आहे.
शिवछत्रपती क्रीडानगरीत झालेल्या निवड चाचणी स्पर्धेतील कामगिरीच्या आधारे भारताच्या मुले व मुली गटाकरिता प्रत्येकी दोन संघांची निवड करण्यात आली आहे. भारत ‘अ’ संघात निवड करण्यात आलेल्या खेळाडूंचा खर्च शासनातर्फे केला जाणार आहे तर ‘ब’ संघात निवडलेले खेळाडू स्वखर्चाने या स्पर्धेत सहभागी होतील. निवड समितीत अखिल भारतीय शालेय क्रीडा महासंघ, महाराष्ट्र राज्य क्रीडा संचालनालय, पुणे जिल्हा हौशी जलतरण संघटना, भारतीय क्रीडा प्राधिकरण यांच्या प्रतिनिधींचा समावेश होता. जे खेळाडू निवड चाचणीत सहभागी झाले नाहीत, त्यांचा निवडीबाबत विचार करण्यात आला नाही असे निवड समितीकडून सांगण्यात आले. भारतीय संघाबरोबर प्रशिक्षक म्हणून दिनकर सावंत व बालाजी केंद्रे यांची नियुक्ती करण्यात आली आहे.
मुली ‘अ’ संघ-मोनिक गांधी, ऋजुता भट, अनन्या पाणिग्रही, आकांक्षा व्होरा, एम.डी.शेर्लीन, दीक्षा रमेश. ‘ब’ संघ-एच.तुलसी, एम.सिमरन, अंतरा अगरवाल, अंजली नायर, अर्चित भारद्वाज, श्रीशा मेहता.
मुले ‘अ’ संघ-नील कॉन्ट्रॅक्टर, एस.पी.निकित, रोहित इमोलिया, रक्षित शेट्टी, अरविंद मणी, मितेश कुंटे. ‘ब’ संघ-टी.सेतुमणी, राहुल शर्मा, महंमद याकुब, राहुल रजानी, बॉबी राणा, के.मुकुंदन.

सोनेरी यश मिळविन : अनन्या
ही स्पर्धा मला आगामी अन्य आंतरराष्ट्रीय स्पर्धासाठी पूर्वतयारी असून या स्पर्धेत मी सोनेरी यश मिळविन असा आत्मविश्वास अनन्या पाणिग्रही हिने व्यक्त केला. भारतीय संघात निवड झालेली ती पुण्याची एकमेव खेळाडू आहे. ती पुढे म्हणाली, ५० व १०० मीटर बॅकस्ट्रोक या शर्यतींमध्ये मी भाग घेत आहे. या शर्यतीमध्ये मी राष्ट्रीय विक्रम केला असल्यामुळे पदक मिळविण्यात मला अडचण येणार नाही. येथील सराव शिबिरात आमच्याकडून भरपूर सराव करुन घेण्यात येत आहे.
अनन्या हिने नवी दिल्ली येथे झालेल्या राष्ट्रकुल क्रीडा स्पर्धेत भारताचे प्रतिनिधित्व केले होते. तसेच गतवर्षी ऑलिम्पिकपूर्व पात्रता स्पर्धेतही भाग घेण्याची संधी तिला मिळाली होती. तिने इंडो-बांगला क्रीडा स्पर्धेत तीन सुवर्णपदकांची कमाई केली होती. त्याखेरीज अनेक राष्ट्रीय स्पर्धामध्ये तिने पदकांची लयलूट केली आहे. ती सध्या एनसीएल ज्युनियर कॉलेजमध्ये अकरावी शास्त्र शाखेत शिकत आहे.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व क्रीडा बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Indian team declared fof international swimming competition

ताज्या बातम्या