कोलकाता : कोलकाता नाइट रायडर्स आणि सनरायजर्स हैदराबाद यांच्यात आज, शनिवारी होणाऱ्या सामन्यात मिचेल स्टार्क आणि पॅट कमिन्स हे ‘आयपीएल’मधील दोन सर्वात महागडे खेळाडू समोरासमोर येतील. तसेच दुखापतीतून पुनरागमन करणारा कोलकाताचा कर्णधार श्रेयस अय्यरकडेही सर्वांचे लक्ष राहील. हेही वाचा >>> IPL 2024 CSK vs RCB: चेन्नईची विजयी सलामी; मुस्तफिझूर रहमान विजयाचा शिल्पकार पाठीच्या दुखापतीतून सावरलेला श्रेयस कोलकाता संघाचे नेतृत्व सांभाळेल. मात्र, तंदुरुस्ती पाहता तो यंदा ‘आयपीएल’मध्ये सर्व सामने खेळतो का, याकडे सर्वांचे लक्ष असेल. कोलकाता-हैदराबाद लढतीत स्टार्क आणि कमिन्स या ऑस्ट्रेलियन खेळाडूंतील द्वंद्वही पाहण्यासारखे असेल. यंदाच्या हंगामापूर्वी कोलकाता संघाने स्टार्कला २४ कोटी ७५ लाख रुपयांना खरेदी केले, तर कमिन्सवर सनरायजर्सने २० कोटी ५० लाख रुपयांची विजयी बोली लावली. त्यामुळे ‘आयपीएल’ इतिहासातील हे दोघे सर्वात महागडे खेळाडू ठरले. डावखुरा वेगवान गोलंदाज असलेल्या स्टार्कची ‘पॉवर-प्ले’ आणि हाणामारीच्या षटकांमधील कामगिरी कोलकातासाठी निर्णायक ठरू शकेल. दुसरीकडे, कमिन्स सनरायजर्स संघाचे नेतृत्व करेल. गेल्या तीन हंगामांत अखेरच्या स्थानी राहणाऱ्या हैदराबाद संघाला यश मिळवून देण्याची जबाबदारी कमिन्सवर असेल. हैदराबादकडे ट्रॅव्हिस हेड, हेन्रिक क्लासन आणि एडीन मार्करमसारखे फलंदाज आहेत. ’ वेळ : सायं. ७.३० वा. ’ थेट प्रक्षेपण : स्टार स्पोर्ट्स १, १ हिंदी, जिओ सिनेमा अॅप.
