IPL Final 2025 Ceremony Theme : आयपीएल फायनलसाठी अहमदाबादला जाणाऱ्या विमानांची तिकिटे तिप्पट महाग, हॉटेलचे दरही वधारले; ८० हजार तिकिटांची विक्री

विमान तिकिटे महागली

सोमवारी दिल्ली, बेंगळुरू, मुंबई आणि चंदीगडहून अहमदाबादला येणाऱ्या विमानांचे भाडे २५ हजार रुपयांवर पोहोचले आहे. सामान्य दिवसांमध्ये हे भाडे ३५०० ते ५००० रुपयांपर्यंत असते. इतकेच नाही तर अंतिम सामन्याच्या दुसऱ्या दिवशी (बुधवार) मुंबई, दिल्ली आणि बंगळुरूला जाणाऱ्या सकाळच्या विमानांचे भाडे ३० हजार रुपयांपर्यंत पोहोचले आहे. दुपारी १२ वाजण्यापूर्वी बेंगळुरूला एकूण ५ फ्लाइट्स आहेत, त्यापैकी फक्त २ फ्लाइट्समध्ये काही जागा शिल्लक आहेत. त्यांचे विमान भाडेही १२ हजार रुपयांवरून ३० हजार रुपये झाले आहे.

हा सामना सायंकाळी साडेसात वाजता रंगणार आहे. त्यामुळे मुंबईतून सकाळी अहमदाबादला जाणाऱ्या तिकिटांची रक्कम १५ ते २० हजारांच्या घरात गेल्या आहेत. मेक माय ट्रीपनुसार दुपारी सव्वातीनपर्यंतच्या विमानांची तिकिटे २० हजार रुपये आहेत.

हॉटेल्सचे दर वाढले

विमान तिकिटांच्या किंमती वाढल्याने हॉटेलचालकांनीही दर वाढवले आहेत. इतर शहरांमधून मोठ्या संख्येने लोक अहमदाबादला येणार आहेत, यामुळे शहरातील हॉटेलच्या दरात वाढ झाली आहे. ३ जून रोजी हॉटेलच्या दरात तीन ते चार पट वाढ झाली आहे. साधारणपणे दररोज ९,००० रुपये आकारणारी हॉटेल्स ३ जून रोजी १८,००० रुपये झाली आहेत.

८० हजार तिकिटांची विक्री

अहमदाबादमधील नरेंद्र मोदी स्टेडियमवर खेळल्या जाणाऱ्या या अंतिम सामन्यासाठी ८०,००० तिकिटे ऑनलाइन विकली गेली आहेत. यामध्ये २५,००० तिकिटे मोफत असतील. हे क्रिकेट बोर्डासह इतर संस्थांना दिले जातील. याशिवाय, लष्करी कर्मचाऱ्यांसाठीही जागा राखीव ठेवण्यात आल्या आहेत.

३ जून रोजी मेट्रो सेवा नियमित वेळेपेक्षा जास्त वेळ रात्री १२.३० वाजेपर्यंत चालवली जाणार आहे. मेट्रो प्रवाशांच्या सोयीसाठी, जीएमआरसीने आयपीएल सामन्याच्या दिवशी परतीच्या प्रवासासाठी एक खास कागदी तिकीट सुरू केले आहे. या तिकिटानेच प्रवास करण्याची परवानगी असेल. सामन्याच्या दिवशी क्रॉस रोड, अ‍ॅपेरल पार्क, कालूपूर, जुने हायकोर्ट, थलतेज, मोटेरा, साबरमती, रानीप, वडज आणि जीवराज मेट्रो स्थानकांवरूनही ही कागदी तिकिटे आगाऊ खरेदी करता येतील. त्याचे भाडे प्रति व्यक्ती ५० रुपये असेल.

रात्री उशिरापर्यंत बसचीही सुविधा

अंतिम सामना पाहण्यासाठी आलेले लोक रात्री उशिरा घरी परततील. यामुळे महामंडळाने अतिरिक्त एएमटीएस बसेस चालवण्याचा निर्णय घेतला आहे. बसेस रात्री १० ते पहाटे १:३० वाजेपर्यंत धावतील. मोटेरा येथील नरेंद्र मोदी स्टेडियमजवळील अचेर डेपोमधून या बसेस मणिनगर, ओढव, वासना, उजाला सर्कल आणि नारोळ भागात जातील. रात्रीच्या अतिरिक्त बसेसचे भाडे प्रति प्रवासी ३० रुपये निश्चित करण्यात आले आहे.