IPL 2018 : मुंबईचा हिटमॅन हैदराबादच्या गब्बरवर भारी पडणार ?

फलंदाजी आणि गोलंदाजी या दोन्ही आघाडयांवर मुंबईचा संघ संतुलित आहे. पहिल्या सामन्यात कर्णधार रोहित शर्मा, हार्दिक पांडया यांच्याकडून अपेक्षित कामगिरी झाली नव्हती. पहिल्या लढतीत मुंबईने चेन्नईला विजयासाठी १६६ धावांचे आव्हान दिले होते. चेन्नईचे आठ फलंदाज ११८ धावांमध्येच तंबूत परतले होते. मुंबईचा संघ सहज विजय मिळवेल असे वाटत असतानाच ब्राव्होने (६८) दणकेबाज फलंदाजी करुन हाता-तोंडाशी आलेला विजयाचा घास हिरावून घेतला. त्यामुळे आजच्या सामन्यात फलंदाज आणि गोलंदाज दोघांनाही मागच्या सामन्यातील चुका टाळाव्या लागतील.

हैदराबादचा संघ फलंदाजी आणि गोलंदाजी दोन्ही आघाडयांवर मजबूत आहे. भुवनेश्वर कुमार, शाकीब अल हसन, राशिद खान हे गोलंदाज तर विल्यमसन, शिखर धवन आणि वृद्धीमान सहा हे फलंदाज त्यांच्याकडे आहेत. त्यामुळे आजचा सामना मुंबईसाठी तितका सोपाही नसेल.