IPL 2023, SRH vs LSG: निकोलस पूरनचा धमाका! प्रेरकच्या अर्धशतकाच्या जोरावर लखनऊचा SRH वर दणदणीत विजय

लखनऊची सुरुवात खराब झाल्यानंतरही निकोलस पूरन आणि प्रेरक मंकडने धडाकेबाज फलंदाजी करत लखनऊला विजय मिळवून दिला. मंकडने ४५ चेंडूत ६४ धावांची नाबाद खेळी केली. तर पूरनने १३ चेंडूत ४४ धावांचा पाऊस पाडला. मार्कस स्टॉयनिसनेही २५ चेंडूत ४० धावांची खेळी साकारली. या धावांच्या जोरावर लखनऊने १८३ धावा करून हैद्राबादवर ७ विकेट्सने विजय मिळवला. ग्लेन फिलिप्स, मयंक मार्कंडे आणि अभिषेक शर्माला प्रत्येकी एक विकेट घेण्यात यश मिळालं.

हैद्राबादसाठी सलामीवीर फलंदाज अभिषेक शर्मा स्वस्तार माघारी परतला. त्यानंतर अनमोल प्रीतने ३६ धावांची खेळी साकारून हैद्राबादच्या धावसंख्येचा आलेख उंचावला. राहुल त्रिपाठीने २० तर कर्णधार एडन मार्करमने २८ धावांची खेळी केली. त्यानंतर हेन्री क्लासेन आणि अब्दुल समदने जबरदस्त भागिदारी करून हैद्राबादची धावसंख्या वाढवली. त्यामुळे २० षटकांत हैद्राबादने सहा विकेट्स गमावत १८२ धावा केल्या. लखनऊ सुपर जायंट्सच्या गोलंदाजांनी भेदक मारा करून हैद्राबादच्या फलंदाजांना गुंडाळलं.

कर्णधार कृणाल पांड्याने एकाच षटकात दोन विकेट्स घेऊन हैद्राबादच्या संघाला मोठा धक्का दिला. पांड्याने मार्करमला २८ धावांवर असताना बाद केलं. त्यानंतर दुसऱ्याच चेंडूवर ग्लेन फिलिप्सचा त्रिफळा उडवला. फिलिप्स शून्यावर बाद झाल्याने हैद्राबादच्या धावसंख्येची गती मंदावली. परंतु, हेन्री क्लासेननं पुन्हा एकदा सावध खेळी करून २९ चेंडूत ४७ धावा कुटल्या. तर अब्दुल समदने २५ चेंडूत ४ षटकार आणि १ चौकराच्या मदतीनं ३७ धावांची नाबाद खेळी केली. लखनऊसाठी कृणाल पांड्याने दोन विकेट्स घेतल्या. युधवीर चरक, अमित मिश्रा आणि यश ठाकूरला प्रत्येकी एक विकेट मिळाली.