Gautam Gambhir Laughing Video Viral: लखनऊ सुपर जायंट्सचा मेंटॉर गौतम गंभीर नेहमीच गंभीर दिसतो. त्याचा रागही सर्वश्रुत आहे. कोणाचाही सामना करायला सुद्धा मागेपुढे न पाहणाऱ्या गौतम गंभीरने मोठ-मोठ्यांचीही बोलती बंद केली आहे. कर्णधार केएल राहुलने गुजरात टायटन्सविरुद्ध संथ खेळी खेळली, तेव्हा गंभीरचा रागाने लालबुंद झालेला चेहरा दिसला होता. या सामन्यात लखनौला ७ धावांनी पराभव स्वीकारावा लागला. मात्र, पंजाब किंग्जविरुद्धच्या सामन्यातील गौतम गंभीरचा एक व्हिडीओ व्हायरल होत आहे.
लखनऊ सुपर जायंट्सच्या फलंदाजाने प्रथम पंजाब किंग्जच्या गोलंदाजांची जबरदस्त धुलाई करताना २५७ धावांचा भला मोठा डोंगर उभारला. त्यानंतर गोलंदाजीतही संघाने आपला दबदबा कायम राखला. पंजाबच्या डावाच्या १८व्या षटकात जितेश शर्मा बाद होताच डगआऊटमध्ये उपस्थित असलेला गौतग गंभीर हसत हसत काही हातवारे करताना दिसला. हे दृश्य पाहून समालोचकही आश्चर्यचकित झाले आणि हसू लागले. गंभीरचा हा व्हिडिओ मोठ्या प्रमाणात व्हायरल होत असून चाहत्यांच्या मजेशीर प्रतिक्रियाही येत आहेत. काही चाहते गौतम गंभीरच्या हसण्याला आश्चर्य मानत आहेत.
पंजाबच्या गोलंदाजांचा घेतला खरपूस समाचार –
सामन्याबद्दल बोलायचे, तर पंजाब किंग्जने नाणेफेक जिंकून प्रथम क्षेत्ररक्षण करण्याचा निर्णय घेतला. लखनऊचा सलामीवीर काइल मायर्सने २४ चेंडूत ५४ धावा करताना पंजाबच्या गोलंदाजांची दाणादाण उडवली. मार्कस स्टॉइनिसने ४० चेंडूत ७२, निकोलस पूरनने १९ चेंडूत ४५ आणि आयुष बडोनीने २४ चेंडूत ४३ धावा केल्या. अशा प्रकारे लखनऊच्या फलंदाजांनी पंजाबच्या गोलंदाजांचा खरपूस समाचार घेतला.
हेही वाचा – IPL 2023: अनिल कुंबळेची मोठी भविष्यावाणी; एमआय-आरसीबी नव्हे, तर ‘हे’ चार संघ प्लेऑफमध्ये पोहोचणार
या खेळीच्या जोरावर लखनऊ सुपर जायंट्सने २० षटकात ५ गडी गमावून २५७ धावा केल्या. प्रत्युत्तरात पंजाब किंग्ज संघ १९.५ षटकांत २०१ धावा करून सर्वबाद झाला. पंजाबकडून अथर्व तायडे (३६ चेंडूत ६६ धावा) याने सर्वाधिक धावा केल्या. त्याने ३६ चेंडूत ६६ धावांचे योगदान दिले. मात्र, तो आपल्या संघाला विजय मिळवून देऊ शकला नाही. तसेच तीन सामन्यांनंतर संघात परतलेला कर्णधार शिखर धवन एक धावा काढून बाद झाला.
