Mohammed Shami: “माझ्या निवृत्तीमुळे कोणाचं आयुष्य सुधारणार आहे”, निवृत्तीच्या प्रश्नावर मोहम्मद शमी संतापला

न्यूज २४ ला दिलेल्या मुलाखतीत शमीने निवृत्तीच्या प्रश्नावर संतापजनक प्रतिक्रिया दिली आहे. तो म्हणाला,”जर कोणाला काही समस्या असेल तर मला थेट सांगा. माझ्या निवृत्तीमुळे त्यांच्या आयुष्यात काही सुधारणा होत असतील, तर तेही स्पष्ट करा. मी कुणाच्या आयुष्यात अडथळा ठरलो आहे का, की मला निवृत्त व्हावं अशी अपेक्षा ठेवली जाते? ज्या दिवशी मला खेळाचा कंटाळा येईल, त्या दिवशी मी स्वतःहून निवृत्ती घेईन. तुम्ही मला संघात घेत नाही, तरीही मी मेहनत थांबवणार नाही. आंतरराष्ट्रीय क्रिकेटमध्ये संधी नसेल, तर मी देशांतर्गत क्रिकेट खेळत राहीन. कुठे ना कुठे मी खेळतच राहणार. निवृत्तीचा निर्णय तुम्ही नाही, तर मीच घेईन आणि तोही तेव्हाच, जेव्हा मला खरंच कंटाळा येईल. पण ती वेळ अजून आलेली नाही.”

मोहम्मद शमीने आयसीसी वनडे वर्ल्डकप २०२३ स्पर्धेत भारतीय संघाला अंतिम फेरीत पोहोचवण्यात मोलाची भूमिका बजावली होती. तो या स्पर्धेतील सर्वात कमी सामने खेळून सर्वाधिक गडी बाद करणारा गोलंदाज ठरला होता. मात्र, या स्पर्धेनंतर दुखापतीमुळे त्याला स्पर्धेतून बाहेर पडावं लागलं होतं. दुखापतग्रस्त असूनही त्याने भारतीय संघासाठी पूर्ण जोर लावला होता.

दुखापतग्रस्त असल्यामुळे त्याची ऑस्ट्रेलिया दौऱ्यासाठी निवड केली गेली नव्हती. आपल्या दुखापतीबाबत बोलताना शमी म्हणाला, “ऑस्ट्रेलिया दौऱ्याच्या वेळीही मला त्रास जाणवला होता. मी प्रवास करण्यासाठी तयार होता, पण मला अस्वस्थता जाणवत होती. माझ्या मते, जर एखादा खेळाडू संघाच्या अपेक्षा पूर्ण करू शकत नसेल, तर त्याने एक पाऊल मागे घ्यावं. जर पुढे जायचं असेल, तर एक पाऊल मागे घेण्यात ना लाज आहे नाह काही चुकीचं आहे.” भारतीय संघातून गेल्या काही महिन्यांपासून संघाबाहेर असलेला शमी पुनरागमनासाठी सज्ज झाला आहे. तो दुलीप ट्रॉफी स्पर्धेत खेळताना दिसून येणार आहे. इथे चांगली कामगिरी करून तो भारतीय संघात पुनरागमन करण्याच्या प्रयत्नात असणार आहे.