द्रविडच्या शैलीत शिस्त, तर गंभीर अधिक निश्चिंत!

‘‘गंभीर कमालीचा निश्चिंत स्वभावाचा प्रशिक्षक आहे. दडपण हा शब्द त्याच्या शब्दकोशात नसावा. ड्रेसिंग-रूममधील वातावरण चैतन्यदायी राहण्याकडे त्याचा अधिक कल असतो. संघाच्या सरावाच्या सुरुवातीला सकाळी सर्व खेळाडू एकत्र येऊन चर्चा करतात आणि नंतर आपल्या तयारीला सुरुवात करतात. या वेळी तुम्ही आलात तर ठीक, नाही आलात तर तुमच्याशिवाय सरावाला सुरुवात करू, अशी गंभीरची प्रवृत्ती आहे. तो कुणावर चिडत नाही. मात्र, द्रविड यांचे तसे नव्हते. त्यांना प्रत्येक खेळाडूचा चर्चेत सहभाग असायलाच हवा, त्याचबरोबर प्रत्येक खेळाडूने आपले साहित्यच काय, तर पाण्याच्या बाटल्याही ठरलेल्या जागेवरच ठेवायला हव्यात, अशी त्यांची सूचना असायची. त्यांच्या कामात वेगळीच शिस्त होती. अर्थात, द्रविड यांच्याप्रमाणेच गंभीरनेही वागायला हवे असे नाही,’’ असे अश्विन म्हणाला.