INDA vs SAA: एकदा डोक्याला, हाताला मग पोटावर आदळला चेंडू; ऋषभ पंत विचित्र दुखापतीमुळे झाला मैदानाबाहेर, पाहा VIDEO

कर्णधार ऋषभ पंत मैदानावर येताच त्याने आक्रमक फलंदाजीला सुरुवात केली. पण तो बाद न होताच मैदानाबाहेर गेला. तीन चेंडूत तो तीन वेळा वेगवेगळ्या ठिकाणी चेंडू लागला आणि अखेरीस वेदनेने कण्हत तो पॅव्हेलियनमध्ये परतला.

२० मिनिटांत तीन वेळा तीन ठिकाणी ऋषभ पंतला दुखापत

बेंगळुरूमध्ये खेळल्या जाणाऱ्या दुसऱ्या अनऑफिशियल सामन्याच्या तिसऱ्या दिवशी ऋषभ पंतने झटपट सुरुवात केली. दरम्यान, दक्षिण आफ्रिका अ संघाचा वेगवान गोलंदाज त्शेपो मोरेकीचे २० मिनिटांत तीन चेंडू त्याच्या शरीरावर बसले. ज्यामुळे त्याला रिटायर्ड हर्ट होत मैदानाबाहेर जावं लागलं. पहिला चेंडू पंतच्या हेल्मेटला लागला आणि तो खाली पडला. त्यानंतर काही वेळातच, त्शेपो मोरेकीचा एक चेंडू ऋषभ पंतच्या डाव्या कोपरावर लागला. पण तरीही पंत खेळत होता.

पण मोरेकीचा तिसरा चेंडू पंतच्या पोटाला जाऊन लागला आणि यानंतर मात्र कळवळताना दिसला आणि मैदानाबाहेर गेला. पंत २२ चेंडूत २ चौकार आणि एका षटकारासह १७ धावा करत रिटायर्ड हर्ट झाला. पहिल्या डावात ऋषभ पंतने २० चेंडूत २४ धावा केल्या, त्यात तीन चौकार आणि एक षटकार मारला. यानंतर सामन्याच्या तिसऱ्या दिवशी भारत अ संघाची सुरुवात खराब झाली.

सामन्याच्या तिसऱ्या दिवशी, केएल राहुल ६० चेंडूत तीन चौकार लगावत २७ धावा करून बाद झाला. भारत अ संघ पहिल्या डावात २५५ धावांवर सर्वबाद झाला. त्यानंतर दक्षिण आफ्रिका अ संघाने त्यांच्या पहिल्या डावात २२१ धावा केल्या. भारत अ संघाची दुसऱ्या डावाची सुरुवात खराब झाली. सलामीवीर अभिमन्यू ईश्वरनही खातंही न उघडता पॅव्हेलियनमध्ये परतला. साई सुदर्शनने ३८ चेंडूत ५ चौकारांसह २३ धावा केल्या. देवदत्त पडिक्कलने ४२ चेंडूत ३ चौकारांसह २४ धावा केल्या. यानंतर आता मैदानावर ध्रुव जुरेल व हर्ष दुबेची जोडी खेळत आहे.