भारताचा हिवाळी ऑलिम्पिक क्रीडा स्पर्धेतील एकमेव स्पर्धक आरिफ खानला रविवारी जायंट स्लॅलॉम स्कि प्रकारात ४५व्या स्थानावर समाधान मानावे लागले. जम्मू-काश्मीरमधील बारामुल्ला जिल्ह्याच्या ३१ वर्षीय आरिफने यानिक्वग नॅशनल अल्पिने स्किंग सेंटरवर झालेल्या स्पर्धेतील दोन शर्यतींमध्ये एकत्रित २ मिनिटे, ४७.२४ मिनिटे वेळ नोंदवली. हिवाळी ऑलिम्पिक पदार्पण करणाऱ्या आरिफने पहिली शर्यत १:२२.३५ या वेळेत, तर दुसरी शर्यत १:२४.८९ या वेळेत पूर्ण केली. खराब वातावरणामुळे ही स्पर्धा चार तास उशिराने सुरू झाली. स्वित्र्झलडचा सुवर्णपदक विजेता मार्को ओडेरमॅटने २:०९.३५ अशी वेळ नोंदवली. मार्को आणि आरिफ यांच्यात ३७.८९ सेकंद असा वेळेचा फरक होता.
