हल्ली अनेकजण जेवण तयार करण्यासाठी सर्रास नॉन-स्टिक भांड्याच्या वापर करतात. या भांड्यामध्ये जेवण तयार करताना तेलही कमी लागते आणि एखादा पदार्थ भांड्यांच्या तळाला चिकटतही नाही म्हणून गृहिणींची पसंती नॉन-स्टिक भांड्यांना असते. पण, नॉन स्टीक भांड्याचा जास्त प्रमाणात वापर करणंही आरोग्यास धोकादायक ठरू शकतं. काही नॉन- स्टिक भांडी ही दुय्यम दर्जाच्या कोटींगपासून बनवली असतात त्यामुळे अन्न शिजवताना या कोटींगमधले विषारी घटक शरीरात जाऊन शरीराला धोका निर्माण होण्याची शक्यता असते. नॉन-स्टिक भांडी तयार करताना 'परफ्लोरो ओक्टॅनॉइक ॲसिड केमिकल'चा वापर केला जातो, हे आरोग्यासाठी घातक असे केमिकल आहे. वास्तवात नॉन-स्टिक भांड्यामधील ही केमिकल्स स्थिर अवस्थेमध्ये शरीराला घातक नाहीत. मात्र जेव्हा तुम्ही या नॉन-स्टिक भांड्यांना अन्न शिजवण्यासाठी अति-उष्णता देता आणि जेव्हा त्या भांड्याचे तापमान साधारण २६० अंश सेल्सिअस एवढ्या उष्णतेपर्यंत पोहोचते तेव्हा त्यामधील केमिकल्सचे विघटन सुरू होते आणि ते भांडे विषारी वायू फेकू लागते. म्हणून नॉन- स्टिक भांड्यांमध्ये अन्न शिजवता काळजी घेतली पाहिजे. नॉन -स्टिक भांड्यात अन्न शिजवण्यापूर्वी घ्यायची काळजी - ही भांडी वापरताना साबणाच्या कोमट पाण्याने धुऊन आणि कोरडे करून मग वापरावी. - नॉन- स्टिकची भांडी गरम असताना साफ करू नयेत. कारण या भांड्यावर थंड पाणी पडल्यास त्याच्यावरचं कोटिंग निघून जाण्याची शक्यता असते. - नॉन-स्टिक भांडी कधीही खसखसून घासू नयेत. त्याचे कोटिंग निघून जाते. - नॉन-स्टिक भांड्यात अन्न शिजवताना लाकडाच्या चमच्याचा वापर करावा. - नॉन- स्टिक भांडी धुण्यासाठी स्पंज, नायलॉन स्क्रबर, लिक्विड सोप आणि कोमट पाणी याचा वापर करावा. भांडी साफ करण्यासाठी सोडायुक्त साबण, ब्लीच, तारेचा स्क्रबर यांचा वापर कधीही करू नका.