Zoom अ‍ॅपचा वापर करु नका; NASA, अ‍ॅपलसारख्या कंपन्यांच्या कर्मचाऱ्यांना सूचना

ब्लूमबर्गच्या एका रिपोर्टनुसार, अ‍ॅपलचे कर्मचारी घरुन काम करताना भविष्यातील प्लॅन आणि प्रोडक्टबाबतच्या मीटिंग्ससाठी कंपनीच्या स्वतःच्या फेसटाइम अ‍ॅपचा सर्वाधिक वापर करतायेत. याशिवाय, स्लॅक आणि Webex यांसारख्या अ‍ॅप्सचाही वापर करत आहेत. पण, झूम अ‍ॅपचा वापर करत नाहीत. एलन मस्क यांच्या अवकाश शोध घेणाऱ्या स्पेस-एक्स कंपनीनेही आपल्या कर्मचाऱ्यांना झूम अ‍ॅपचा वापर न करण्यास सांगितले आहे. याबाबत स्पेस-एक्सने २८ मार्च रोजी एक मेमो देखील आपल्या कर्मचाऱ्यांना पाठवलाय. “मिटींगसाठी या टूलचा वापर करण्यापेक्षा फोन, इमेल किंवा मेसेजचा वापर करावा”, असे या मेमोमध्ये नमूद करण्यात आले आहे.

दुसरीकडे, नासानेही आपल्या कर्मचाऱ्यांना झूम अ‍ॅपचा वापर न करण्याच्या सूचना कर्मचाऱ्यांना दिल्या आहेत. झूम अ‍ॅपच्या गोपनीयता आणि सुरक्षिततेबाबत काही ऑनलाइन रिपोर्ट्समध्ये गंभीर प्रश्न उपस्थित करण्यात आलेत. तसेच, या अ‍ॅपमध्ये एंड-टू-एंड एन्क्रिप्शनचा अभाव ही एक मोठी चिंता असल्याचं समोर आलं आहे. त्यामुळे कंपन्यांनी या अ‍ॅपचा वापर करण्यास नकार दिल्याचं सांगितलं जात आहे. दरम्यान, “पुढील ९० दिवस दिवस कंपनी कोणतेही नवीन फीचर न आणता त्याऐवजी सुरक्षा आणि गोपनीयतेच्या मुद्द्यांवर कार्य करेल. आवश्यक ती पावलं उचलली जात आहेत”, अशी माहिती झूमचे मुख्य कार्यकारी अधिकारी एरिक एस युआन यांनी एका ब्लॉग पोस्टद्वारे दिली आहे.