weight loss: रोजच्या धकाधकीच्या जीवनात आणि अनियमित जीवनशैलीमुळे लोकांचे वजन झपाट्याने वाढत आहे. त्यामुळे अत्यंत कमी वयामध्ये वेगवेगळे आजारदेखील निर्माण होत आहेत. जास्त प्रथिनांनी युक्त असलेले अन्न खाणे वजन कमी करण्यासाठी आणि आरोग्यासाठी फायदेशीर ठरू शकते. शाकाहारी लोक त्यांच्या आहारात उच्च प्रथिनयुक्त पदार्थांचा समावेश करू शकतात. असा आहार केवळ प्रथिनेच नव्हे, तर इतर आवश्यक जीवनसत्त्वे व खनिजांनी समृद्ध असतो. सात दिवस उच्च प्रथिनयुक्त आहार घेतल्यास वजन कमी करण्यास मदत होऊ शकते.
मात्र, ते दीर्घकाळ टिकणारे नाही. वजन कमी करणे हे तुमच्या सवयीपेक्षा कमी कॅलरी खाण्यावर अवलंबून असते. प्रथिनांमुळे वजन कमी होत नाही; पण त्यात जास्त प्रमाणात असलेला आहार तृप्ततेची हमी देतो आणि त्यामुळे तुम्हाला जास्त काळ पोट भरल्यासारखे वाटते आणि परिणामी तुम्ही कमी खाता, तुमची लालसा कमी होते. या संदर्भात ‘द इंडियन एक्स्प्रेस’शी बोलताना पोषणतज्ज्ञ डॉ. प्रियंका रोहतगी यांनी सविस्तर माहिती दिली आहे.
रोज रोज प्रथिनयुक्त अन्न खाणे तसे कठीण आहे. आपल्याला चमचमीत खायची सवय असते. अशा वेळी साधे प्रथिनयुक्त अन्न खाताना कठीण जाते. अशा वेळी आपण काही दिवस हे अन्न खातो आणि वजन कमी झाल्यावर पुन्हा आपले रोजचे जेवण जेवतो. आहारातून जास्त प्रथिने घेतल्यामुळे तुमचे मूत्रपिंड खराब होऊ शकते. रक्तातील अतिरिक्त प्रथिने फिल्टर करण्यासाठी मूत्रपिंड जबाबदार असतात. जर तुम्ही जास्त प्रथिने खाल्ली, तर मूत्रपिंडावर परिणाम होऊ शकतो. जास्त काळ प्रथिनांचे सेवन केल्याने पचन आणि हाडांचे विकारही होऊ शकतात. अतिशय सक्रिय जीवनशैली असलेले लोक बैठी जीवनशैली असलेल्या लोकांपेक्षा जास्त प्रमाणात प्रथिने सहन करू शकतात.
प्रथिनयुक्त अन्न हे हळूहळू पचणारे पोषक आहे, यामुळे व्यायाम करणे कठीण होऊ शकते, जे वजन कमी करण्यासाठी महत्वाचे आहे. जास्त प्रमाणात प्रथिने खाल्ल्याने बद्धकोष्ठता, अतिसार आणि गॅस सारख्या पचनाच्या समस्या उद्भवू शकतात.जास्त प्रथिने खाल्ल्याने निर्जलीकरण होऊ शकते, ज्यामुळे थकवा, चक्कर येणे आणि डोकेदुखी होऊ शकते.
जीवनशैलीत बदल करणे महत्त्वाचे
जर तुम्ही वजन कमी करण्याचा विचार करत असाल, तर तुमच्या आहार आणि जीवनशैलीत बदल करणे महत्त्वाचे आहे. तुमच्या कॅलरीजचे प्रमाण कमी करण्यासाठी वैयक्तिक सल्ला घेण्यासाठी तुमच्या डॉक्टरांशी किंवा नोंदणीकृत आहारतज्ज्ञांशी बोला. महिलांनी १,२०० ते १,५०० ते १,८०० कॅलरी असलेला आहार घ्यावा. तुमच्या आहाराचे नियोजन करताना तज्ज्ञ तुमच्या शरीराचे वजन बघेल आणि त्यानुसार तुमचा व्यायाम ठरवेल. साधारणपणे, तुम्हाला तुमच्या दैनंदिन गरजेपेक्षा सुमारे ३० टक्के कमी कॅलरी खाण्याची गरज आहे.
हेही वाचा >> Weight Loss: दही की ताक? वजन कमी करण्यासाठी नेमकं काय खावे, वाचा तज्ज्ञ काय सांगतात
व्यायामाला पर्याय नाही
आहारावर नियंत्रण आवश्यक असताना, व्यायाम हा एक पर्याय आहे; जो तुमचे वाढणारे वजन कमी करू शकतो. तुम्ही आठवड्यातून किमान १५० मिनिटे शारीरिक हालचाली कराव्यात; जसे की वेगाने चालणे. केवळ आहाराद्वारे वजन कमी करण्याची शिफारस करण्यात आलेली नाही. त्यामुळे व्यायाम करणे गरजेचे आहे. व्यायामाने तुमचा मधुमेह, रक्तदाब व हृदयविकाराचा धोकाही कमी होईल.
