पोटदुखीपासून आराम मिळण्यासाठी खरंच कांद्याचा रस फायद्याचा आहे का? कुशा कपिलाने सांगितला वैयक्तिक अनुभव; वाचा, तज्ज्ञ काय सांगतात?

कुशा कपिला ही मीरा कपूर, नीतू कपूर आणि अथिया शेट्टी यांच्याशी संवाद साधताना सांगते, “जेव्हा तुम्हाला पोटदुखीचा त्रास उद्भवतो तेव्हा कांद्याचा रस फायद्याचा ठरतो. लहानपणी आई मला कांद्याचा रस प्यायला द्यायची.”
कपिलाने सांगितल्याप्रमाणे, एक कांदा घ्या आणि त्याचा रस काढा आणि प्या. याविषयी द इंडियन एक्स्प्रेसनी तज्ज्ञांच्या हवाल्याने कांद्याचा रस पिण्याचे फायदे जाणून घेतले.

कांद्याच्या रसाचे फायदे

हैदराबाद येथील ग्लेनेगल्स हॉस्पिटल्सच्या क्रिटिकल केअर विभागाचे प्रमुख आणि सल्लागार डॉ. मनेंद्र सांगतात, “कांद्याचा रस पोटदुखीसह विविध आजारांवर दीर्घ काळापासून घरगुती उपचार म्हणून वापरला जातो.”

मनेंद्र सांगतात, “कांद्याच्या रसामध्ये सल्फर, फ्लेव्होनॉइड्स आणि अँटिऑक्सिडंट्स आहेत, ज्यात आरोग्यासाठी फायदेशीर असे गुणधर्म आहेत. कांद्याचा रस अपचन किंवा सौम्य गॅस्ट्रोइंटेस्टाइनल संसर्गामुळे होणारा पोटाचा त्रास कमी करण्यास मदत करू शकतो.

हेही वाचा : Nutritional Powerhouses For Liver : क्रूसीफेरस भाज्या म्हणजे काय तुम्हाला माहीत आहे का? यकृतासाठी होतो मोठा फायदा; वाचा, तज्ज्ञ काय म्हणतात…

वैद्यकीय सल्ला महत्त्वाचा

त्यांनी निदर्शनास आणले की, पोटदुखीसाठी कांद्याचा रस फायदेशीर असल्याचे वैज्ञानिक पुरावे मर्यादित आहेत. ते पुढे सांगतात, “अति संवेदनशील पोट किंवा ॲसिड रिफ्लक्स (पचनाशी संबंधित आजार) सारख्या परिस्थितीमध्ये कच्च्या कांद्याचा रस खाल्ल्याने लक्षणे वाढू शकतात, ज्यामुळे छातीत जळजळ किंवा चिडचिड होऊ शकते”, असे डॉ. मनेंद्र सांगतात.

असे उपाय करण्यापूर्वी पोटदुखीचे मूळ कारण ओळखणे महत्त्वाचे आहे – मग ते गॅस, पोट फुगणे, संसर्ग किंवा कोणत्याही पोटाशी संबंधित गंभीर समस्यांमुळे पोटदुखी उद्भवू शकते. “पोटदुखीदरम्यान हायड्रेशन, विश्रांती आणि गरज भासल्यास ओव्हर-द-काउंटर औषधे (नॉन-प्रिस्क्रिप्शनशिवाय घेतलेली औषधी) घेऊ शकता”, असे डॉ. मनेंद्र सांगतात.

पाहा व्हिडीओ

हेही वाचा : HMPV Virus Causes Treatment : एचएमपीव्ही व्हायरसचा कहर! हा आजार किती घातक, नेमकी लक्षणे काय? संसर्गावर उपाय कोणते? जाणून घ्या सर्व काही….

जर तुम्हाला पोटदुखीसंदर्भात गंभीर लक्षणे दिसून येत असतील तर वैद्यकीय सल्ला घेणे महत्त्वाचे आहे, असे डॉ. मनेंद्र सांगतात. “कांद्याचा रस काही लोकांना थोडा आराम देऊ शकतो, पण पोटाशी संबंधित आजारासाठी वैद्यकीय सल्ला घेणेही तितकेच महत्त्वाचे आहे,” असे डॉ. मनेंद्र म्हणाले.