Jaggery Tea: गुळाचा चहा पिणं आरोग्यासाठी ठरु शकतं हानिकारक; कसं ते जाणून घ्या

दरम्यान, सध्या लोकांना गुळाचा चहा मोठ्या प्रमाणात आवडायला लागला आहे. त्यामुळेच शहरात रस्त्यावरच्या टप्परीवर मोठ्या अक्षरात ‘येथे गुळाचा चहा मिळेल’ असे बोर्ड लावलेले दिसतात तर या टपऱ्यांसमोर चहा प्रेमींच्या लागलेल्या रांगा आपणला पाहायला मिळतात. त्यामुळे गुळाच्या चहाची क्रेझ तरुणांमध्ये मोठ्या प्रमाणात आहे, हे आपण नाकारु शकत नाही.

आणखी वाचा- चहाप्रेमींनो, तुम्ही पण थंड झालेला चहा पुन्हा गरम करून पिताय? मग आताच थांबा, अन्यथा होतील ‘हे’ गंभीर परिणाम

मात्र, आपण पितोय तो गुळाचा चहा आरोग्यासाठी योग्य की अयोग्य? याबाबत अनेक मतभेद आहेत. शिवाय आयुर्वेदामध्ये दुध आणि गुळ यांना विरुद्ध आहार म्हटलं आहे. त्यामुळे गुळाचा चहा पिण्याला आयुर्वेदात तरी मान्यता नाही. कारण गुळ आणि दुधाला ते विरुद्धहार मानतात. विरुद्ध आहार म्हणजे, असे काही अन्नपदार्थ की, त्यांच्या चुकीच्या मिश्रणामुळे आपल्या शरीरात विष तयार होऊ शकते आणि त्याचा आपल्या आरोग्यावर विपरित परिणाम होऊ शकतो.

त्यामुळेच दुध आणि गुळ हे एकत्रित केल्यास ते शरीराला हानिकारक ठरू शकतात असं मतं आयुर्वेद तज्ज्ञ डॉ. रेखा राधामणी यांनी व्यक्त केलं आहे. त्या आपल्या इंस्टाग्राम पोस्टमध्ये लिहितात, अनेक अन्नपदार्थांच्या चुकीच्या मिश्रणामुळे शरीरात विष तयार होऊ शकते. प्रत्येक अन्नाची वेगळी गुणवत्ता असते. त्यानुसार हे दूधाची गुणवत्ता थंड आहे तर गूळ उष्ण आहे. त्यामुळे आपण जेव्हा उष्ण अन्न, शीत ऊर्जायुक्त अन्नामध्ये मिसळतो तेव्हा ते चुकीचं मिश्रण होतं आणि त्यामुळे आपणाला पित्तासह आरोग्याच्या अनेक समस्यांना सामोरं जावं लागतं.

त्यामुळे कोणत्याही पदार्थाचं मिश्रण करताना त्याचा आरोग्यावर काय परिणाम होईल याचा विचार करायला हवा, असा सल्ला त्या देतात. दरम्यान आयुर्वेदानुसार अन्नपदार्थांचे चुकीचे मिश्रण कोणते ते जाणून घेऊयात. केळी आणि दुध, दुध आणि मासे, मध आणि तूप या पदार्थांचे मिश्रण आयुर्वेदानुसार चुकीचे मानले जाते.