३१ मार्चपूर्वी ही महत्त्वाची कामे करायलाच हवीत

प्रलंबित आयटीआर फाईल करा

३१ मार्च २०१८ ही आर्थिक वर्ष २०१५-१६ आणि २०१६-१७ साठीचे आयकर विवरण भरण्याची शेवटची तारीख आहे. म्हणून जर तुम्ही अगोदरच्या वर्षांसाठी आयकर विवरण फाईल करू शकला नाहीत, तर ते याच आठवड्यात भरण्याची काळजी घ्या, ज्यानंतर असे विवरण सादर केल्यास दरमहा १ टक्के दंड लागू शकतो आणि काही खास बाबींमध्ये ५००० रुपये दंडही होऊ शकतो.

करबचत करणारी गुंतवणूक

चालू आर्थिक वर्षात (आ.व. २०१७-१८) कर वाचविण्यासाठी केलेल्या सर्व गुंतवणुका तुमच्या आयकर विवरणाचा एक भाग असतात. जे तुम्ही ३१ जुलै २०१८च्या आधी फाईल केलेच पाहिजे. म्हणून तुम्ही जर अजूनही करबचत करणाऱ्या गुंतवणुका केलेल्या नसतील तर तुमच्या हाती आता फक्त काही दिवसच शिल्लक राहिलेत. मार्च महिन्याचे शेवटचे सात दिवस संपण्यापूर्वी बँकांसाठी कामकाजाचे आता फक्त चारच दिवस उरलेले आहेत. म्हणून तुम्ही जर तुमचा टॅक्स प्लॅन अमलात आणण्याची वाट पाहत असाल, तर आता त्यासाठी अजून उशीर करू नका.

आरोग्य तपासणी

जर तुमची आरोग्यतपासणी तुम्ही ३१ मार्च २०१८ पूर्वी केली, तर रोगप्रतिबंध करण्याच्या दृष्टीने केलेल्या तपासणीसाठी तुम्ही आयकर कायद्याच्या कलम ८०डी अंतर्गत अतिरिक्त करसवलतीचा दावा करू शकता. शिवाय, अनेक विमा कंपन्या त्यांच्या योजनांच्या धोरणांनुसार रोगप्रतिबंधक आरोग्यतपासणीसाठी केलेल्या खर्चाची प्रतिपूर्ती करतात. लक्षात ठेवा की, रोगप्रतिबंधक आरोग्यतपासणीसाठी केलेल्या खर्चाची प्रतिपूर्ती वेगवेगळ्या कंपन्यांनुसार वेगवेगळी असू शकते आणि फक्त तेवढीच रक्कम करसवलतीसाठी पात्र असते.

प्रपत्र १५जी/एच फाईल करा

जर तुम्ही मुदतठेव ठेवलेली असेल आणि त्यांवरील उत्पन्न हे एका आर्थिक वर्षामध्ये १०,००० पेक्षा अधिक असेल, तर बँक अशा उत्पन्नापासूनचे टीडीएस कापून घेईल. परंतु जर तुमचे उत्पन्न अशा व्याजासहित करपात्र उत्पन्नमर्यादेत मोडणारे नसेल, तर बँकेला टीडीएसची रक्कम न कापण्याच्या सूचना देण्यासाठी तुम्ही प्रपत्र १५जी/एच घोषणापत्राचा वापर करू शकता. प्रपत्र १५एच ज्येष्ठ नागरिकांसाठी असतो, तर प्रपत्र १५जी जे लोक ज्येष्ठ नागरिक या संज्ञेत मोडत नाहीत, त्यांच्यासाठी असतो. व्याजावरील सूट देण्याची ही मर्यादा ज्येष्ठ नागरिकांसाठी येत्या आर्थिक वर्षासाठी ५०,००० रुपयांपर्यंत वाढविण्यात येत आहे.

एलटीसीजी टाळण्यासाठी गुंतवणूक रिडीम करा

३१ मार्चनंतर केलेल्या इक्विटी-ओरिएंटेड गुंतवणुकांपासून केलेल्या दीर्घकालीन भांडवली लाभ (एलटीसीजी) १० टक्के दराने एलटीसीजी करास पात्र असतो. म्हणून तुमच्याकडे दीर्घकालीन बनलेल्या (ज्या एक वर्ष किंवा त्यापेक्षा अधिक कालावधीच्या इक्विटी) इक्विटी गुंतवणुका असतील, तर तुम्ही ३१ मार्चपूर्वी त्यांची विक्री करून करमुक्त परतावा मिळवू शकता. जर तुम्ही तुमची दीर्घकालीन इक्विटी ३१ मार्चनंतर कोणत्याही वेळी विकली, तर १,००,००० रुपयांच्या दीर्घकालीन भांडवली नफ्यावर तुम्हाला १० टक्के रक्कम आकारली जाईल.

आर्थिकदृष्ट्या सावध राहून इतर कोणतीही प्रलंबित कामे ३१ मार्चपूर्वी पूर्ण करून तुमच्या पैशांसंबंधीच्या बाबींचे कार्यक्षमपणे व्यवस्थापन करा, ज्यायोगे तुम्ही तुमचे करविषयक दायित्व जास्तीतजास्त कमी करू शकाल.

आदिल शेट्टी,

सीईओ, बँकबझार