सणासुदीच्या कालावधीत अनेकांची ओढ ऑनलाइन शॉपिंगकडे असते. इतर दिवसांच्या तुलनेत सणासुदीच्या कालावधीत ऑनलाइन शॉपिंग करणाऱ्यांच्या संख्येत मोठ्या प्रमाणात वाढ होत असते. याच पार्श्वभूमीवर ऑनलाइन शॉपिंग पोर्टल अॅमेझॉन आणि फ्लिपकार्टने तब्बल एक लाख ४० हजार नव्या कर्मचाऱ्यांची नियुक्ती केली आहे. कंत्राटी पद्धतीने या कर्मचाऱ्यांची नियुक्ती करण्यात आली आहे. खरेदी करण्यात येणाऱ्या वस्तू आपल्या ग्राहकांपर्यंत पोहोचवण्यासाठी या कर्मचाऱ्यांची नियुक्ती करण्यात आली आहे.
दरवर्षीप्रमाणे यावर्षीही अॅमेझॉन आणि फ्लिपकार्टसारख्या कंपन्यांकडून सणासुदीच्या पार्श्वभूमीवर नव्या ऑफर्स देण्यात आल्या आहेत. त्यातच नवनव्या ऑफर्समुळे ग्राहकांचा कलही ऑनलाइन शॉपिंगकडेच असतो. सणासुदीच्या आणि ऑफर्सच्या कालावधीत कंपन्यांवर मोठ्या प्रमाणात ताण निर्माण होत असतो. तो ताण कमी करण्यासाठी आता अॅमेझॉन आणि फ्लिपकार्टने कंत्राटी कर्मचाऱ्यांची नियुक्ती केली आहे.
अॅमेझॉनने ९० हजार तर फ्लिपकार्टने ५० हजार कंत्राटी कर्मचाऱ्यांची नियुक्ती केली आहे. मुंबई, पुणे, दिल्ली, हैदराबाद, चेन्नई, बंगळुरू आणि अहमदाबाद या ठिकाणी कर्मचाऱ्यांची भरती करण्यात आली आहे. गेल्यावर्षीच्या तुलनेत यावर्षी ३० टक्के अधिक कंत्राटी कर्मचाऱ्यांची भरती करमअयात आली असल्याची माहिती समोर आली आहे.
