मोदीमय वातावरणाचा भाजपला फायदा

बरोबर तीन महिन्यांपूर्वी झालेल्या विधानसभा निवडणुकीत सत्ताधारी काँग्रेसचा सुफडा साफ करत भाजपने राजस्थानमध्ये सत्ता स्थापन केली. येणाऱ्या लोकसभा निवडणुकीची ती नांदी होती. तत्कालीन मुख्यमंत्री अशोक गेहलोत यांच्या सरकारने जनहिताचे निर्णय घेऊनही राजस्थानमध्ये काँग्रेसचा पराभव झाला. याचे मुख्य कारण म्हणजे या वाळवंटी प्रदेशात निर्माण झालेले मोदीमय वातावरण! या वातावरणाचा फायदा विधानसभा निवडणुकीत भाजपने उठवला, तसाच फायदा लोकसभा निवडणुकीत त्यांच्याकडून उठवला जाईल, हे निश्चित.
खरे म्हणजे राजस्थान हा कधीही कोणत्या एका पक्षाचा बालेकिल्ला राहिलेला नाही. गेल्या दोन दशकांपासून या राज्यात कधी काँग्रेसला, तर कधी भाजपला फायदा झाला. गेल्या लोकसभा निवडणुकीत काँग्रेसला आंध्र प्रदेशनंतर राजस्थानमधूनच सर्वाधिक जागा मिळाल्या होत्या. लोकसभेच्या २५ जागांपैकी तब्बल २० जागा काँग्रेसच्या पारडय़ात पडल्या होत्या. त्यावेळीही लोकसभा निवडणुकीपूर्वी झालेल्या विधानसभा निवडणुकीत भाजपचा पराभव करून काँग्रेस सत्तेवर आली होती. आता मात्र परिस्थिती उलट आहे. विधानसभा निवडणुकीचीच पुनरावृत्ती लोकसभा निवडणुकीत होईल, अशीच स्थिती सध्या राजस्थानमध्ये आहे. त्यामुळे काँग्रेसला या राज्यातील जागा टिकवण्यासाठी शर्थीचे प्रयत्न करावे लागणार आहेत.
काँग्रेसचे उपाध्यक्ष राहुल गांधी यांनी पंधरवडय़ापूर्वीच या राज्याचा दौरा केला आणि राज्यातून नवीन चेहऱ्यांना संधी देणार असल्याचे सांगितले होते. मोदीमय वातावरणामुळे अधिकाधिक जागा जिंकण्याचे आव्हान काँग्रेसपुढे आहे, त्यामुळे विजयाची क्षमता असलेल्या नव्या चेहऱ्यांना काँग्रेसकडून संधी मिळणार असल्याचे समजते. भाजपने गुजरातच्या विकासाचा मुद्दा घेऊन येथे प्रचाराला सुरुवात केली आहे. मात्र मोदी यांचा गुजरात विकासाचा मुद्दा किती फसवा आहे, हे दाखवण्याचा प्रयत्न काँग्रेसने सुरू केला आहे.
राजस्थानच्या मुख्यमंत्री वसुंधरा राजे यांनी राज्यातील सर्व २५ जागा भाजपच जिंकेल, असा दावा करून धडाक्यात प्रचाराला सुरुवात केली. ‘मिशन-२५’ अशी योजना तयार करून ती पूर्ण करण्यासाठी त्यांनी पदाधिकारी, कार्यकर्त्यांशी संवाद साध्याचा कार्यक्रम सुरू केला आहे. गुजरात, मध्य प्रदेश या राज्यांप्रमाणे राजस्थानमधून अधिकाधिक जागा मिळतील, अशी अपेक्षा भाजपच्या केंद्रीय नेतृत्वाकडून व्यक्त केली जात आहे. मात्र तरीही त्यांना गाफील राहून चालणार नाही. ‘‘नरेंद्र मोदी हे गोबेल्सनीतीचा वापर करत असून त्यांचे विकासाचे ‘गुजरात मॉडेल’ फसवे आणि दिशाभूल करणार आहे,’’ असा आरोप करत माजी मुख्यमंत्री अशोक गेहलोत यांनी या विधानाचा वापर करूनच काँग्रेसचा प्रचार केला. काँग्रेसचे प्रदेशाध्यक्ष सचिन पायलट यांनी युवाशक्तीवर अधिक भर दिला आहे. तरुणांना आकर्षित करण्यासाठी त्यांनी विविध योजना आखल्या आहेत.
राजस्थानमध्ये काँग्रेस व भाजप या राष्ट्रीय पक्षांशिवाय अन्य प्रादेशिक पक्ष नसल्याने येथे केवळ दुरंगीच लढती होणार आहेत. अरविंद केजरीवाल यांच्या ‘आम आदमी पक्षा’ने राजस्थानमध्ये आम्ही सर्व जागा लढवणार असल्याचे म्हटले असले तरी, खरी लढत काँग्रेस व भाजप यांच्यातच होणार आहे. नरेंद्र मोदी यांच्या जोरावर भाजप लोकसभा निवडणूक लढवणार आहे, तर मोदींची लाट कशी फसवी आहे, यावर काँग्रेसचा जोर आहे. म्हणजेच दोन्ही पक्षांच्या प्रचाराच्या केंद्रस्थानी मोदी हेच आहेत.