आंघोळ करताना मृत्यू झाल्याचे तुम्ही कधी ऐकले आहे का? मात्र नाशिकमध्ये एका तरूण डॉक्टरचा मृत्यू शॉवर घेताना झाला. शॉवरमधून करंट उतरला आणि या डॉक्टरचा मृत्यू झाला. आशिष काकडे असे या डॉक्टरचे नाव आहे. गंगापूर रोडवरील इंद्रपस्थ सोसायटीत आशिष काकडे राहात होते. दुपारच्या सुमारास आशिष काकडे यांच्या घरातून पाणी येत असल्याचे सोसायटीत राहणाऱ्या रहिवाशांच्या लक्षात आले. त्यानंतर शेजाऱ्यांनी घरात जाऊन पाहिले असता डॉक्टर आशिष बाथरूममध्ये मृतावस्थेत आढळून आले. या संदर्भात तातडीने सरकारवाडा पोलीस ठाण्यात तक्रार नोंदवण्यात आली. पोलिसांनी घटनास्थळी येऊन डॉक्टर काकडे यांचा मृतदेह ताब्यात घेतला आणि शवविच्छेदनासाठी पाठवला. शवविच्छेदन अहवालातच डॉक्टर काकडे यांचा मृत्यू शॉक लागून झाल्याचे स्पष्ट झाले. डॉक्टर आशिष काकडे तळोदा येथील आहेत. त्यांचे आई वडिलही डॉक्टरच आहेत. आशिष काकडे नाशिकच्या मोतिवाला महाविद्यालयात प्रशिक्षणार्थी डॉक्टर म्हणून कार्यरत होते. 'एबीपी माझा'ने या संदर्भातले वृत्त दिले आहे. या घटनेची माहिती मिळताच सरकारवाडा पोलीस घटनास्थळी आले. डॉक्टर काकडे यांच्या मृतदेहावर ठिकठिकाणी भाजल्याच्या खुणा होत्या. डॉक्टर काकडे यांचा मृत्यू पहाटेच्या वेळी अंघोळ करताना झाला असावा असा अंदाज वर्तवण्यात आला आहे. नंदुरबारमधील तळोदा हे त्यांचे मूळ गाव आहे.
