नरेंद्र मोदी हे पहारेकरी चोर आहेत असं सांगता तर मग त्यांच्यासोबत का बसता.असंगाशी संग कशाला असा सवाल करतानाच ढवळया शेजारी बांधला पवळ्या गुण नाही पण वाण लागला असल्याची जोरदार टिका माजी उपमुख्यमंत्री आमदार छगन भुजबळ यांनी पारनेरच्या जाहीर सभेत शिवसेनेवर केली. भाजपा सत्तेत राहून चुका करत असेल तर त्या चुकांमध्ये उध्दव ठाकरे तुम्ही सुद्धा जबाबदार आहात असा आरोपही आमदार छगन भुजबळ यांनी केला. अहमदनगर जिल्ह्यातील पारनेर येथील जाहीर सभेत आमदार छगन भुजबळ यांनी शिवसेनेवर जोरदार हल्लाबोल केला. निलेश लंकेच्या प्रवेशानंतर पारनेरमध्ये राष्ट्रवादीचा आमदार होईल - जयंत पाटील निलेश लंके यांचा राष्ट्रवादी मध्ये प्रवेश झाला असल्याचे जाहीर करतानाच भविष्य काळात राष्ट्रवादी काँग्रेसचा आमदार होईल असा शब्द प्रदेशाध्यक्ष आमदार जयंतराव पाटील यांनी पारनेरच्या जाहीर सभेत दिला. आजची पारनेरची प्रचंड मोठी सभा पाहिल्यानंतर राष्ट्रवादी काँग्रेसचाच आमदार निवडून येईल हे स्पष्ट झाले आहे असेही प्रदेशाध्यक्ष आमदार जयंतराव पाटील म्हणाले. अर्थसंकल्प आता मांडला जाणार आहे.त्यावेळी इतक्या घोषणांचा पाऊस पडणार आहे की यापूर्वी कुणीच काही दिलं नाही हे दाखवलं जाणार आहे हे आता लक्षात घ्या असे आवाहनही आमदार जयंतराव पाटील यांनी केले. तुम्हाला फसवणारी टोळी दिल्लीत आणि राज्यात आली आहे आणि हीच टोळी घालवण्याचे काम आपल्याला करायचे आहे असेही आमदार जयंतराव पाटील यांनी सांगितले.
