लाल क्षेत्रांमध्ये घरोघरी वृत्तपत्रे वितरणास रविवारपासून परवानगी देण्यात आली आहे. शासनाने जारी केलेल्या नव्या मार्गदर्शक तत्वांमध्ये वृत्तपत्रे वितरणास परवानगी देण्यात आल्याचे स्पष्ट करण्यात आले आहे. वृत्तपत्र वितरण करणाऱ्यांनी मुखपट्टी लावणे बंधनकारक करण्यात आले आहे. मार्च महिन्यामध्ये टाळेबंदी सुरू झाल्यापासून वृत्तपत्रांच्या घरपोच वितरणास बंदी घालण्यात आली होती. बहुतांश वृत्तपत्रांनी सुरुवातीला ई-आवृत्त्या सुरू ठेवत कालांतराने छपाई सुरू केली. मात्र राज्यातील अनेक शहरांमध्ये गृहनिर्माण संस्थांनी वृत्तपत्र घरी आणून देणाऱ्या विक्रेत्यांना मज्जाव केला. अद्यापही काही शहरांमधील गृहनिर्माण संस्थांनी दूध आणि वृत्तपत्र विक्रेत्यांना आपल्या संकुलामध्ये येण्यास विरोध कायम ठेवला आहे. वृत्तपत्रांमुळे करोना विषाणूचा संसर्ग होत नसल्याचे जागतिक आरोग्य संघटना तसेच सर्व वैद्यकीय तज्ज्ञांनी वारंवार स्पष्ट केले आहे. त्यामुळे रविवारपासून गृहनिर्माणसंस्थांना वृत्तपत्रे घरपोच विक्री करण्याबाबत कोणतेही अडथळे आणता येणार नाहीत.