रत्नागिरी स्थानकावर कोकणकन्या एक्स्प्रेमधील शौचालयामध्ये महिलेचा पाय अडकल्याची घटना आज घडली होती. त्यानंतर, ११ तासांच्या अथक प्रयत्नांनंतर महिलेचा पाय सुखरुप बाहेर काढण्यात सुरक्षा यंत्रणेला यश आले आहे. राबीया शेख (६८) असे शौचालयात पाय अडकलेल्या महिलेचे नाव आहे. ही महिला ठाण्याहून करमाळी गोवा असा प्रवास करत होती. राबीया या प्रवासादरम्यान रात्रीच्या सुमारास रेल्वेच्या शौचालयात गेल्या त्यावेळी त्यांचा पाय त्यात अडकला. त्यानंतर महिलेचा पाय सुखरूप सोडवण्यासाठी डबा गाडीपासून वेगळा करण्यात आला होता. मात्र शौचालयाचे होल आणि पायाचे माप सारखेच असल्याने पाय काढण्यात अडचणी येत होत्या. अखेर, ११ तासांच्या अथक प्रयत्नांनंतर महिलेच्या पायास कोणतीही इजा होऊ न देता सुखरुप सुटका करण्यात आली.
