प्रजासत्ताक दिनाच्या सुट्टीचा आनंद साजरा करण्यासाठी इटियाडोह धरण भागात दोन तरूण गेले होते. सेल्फी काढण्याच्या नादात या दोन तरूणांचा बुडून मृत्यू झाला. २६ जानेवारीची सुट्टी साजरी करण्यासाठी रामदास गोटफोडे आणि एजाज नईम शेख हे दोन तरूण या भागात फिरायला गेले होते. रामदास हा डिपरटोला कुरखेडा गडचिरोलीमध्ये राहणारा आहे. तर एजाज गांधी वॉर्ड, कुरखेडा या ठिकाणी राहतो. हे दोघेही आजच सकाळी इटियाडोह भागात आले होते. अकोला भागात ही घटना घडली आहे. या ठिकाणी हे दोघे फिरायला आले होते. इटियाडोह भागात नयनरम्य धरण आहे. सुट्टीच्या दिवशी या ठिकाणी नेहेमीच गर्दी असते. मात्र या ठिकाणी धरणात उतरून फोटो काढण्याचा मोह लोकांना आवरत नाही. अशाच प्रकारे हे दोघे तरूणही पाण्यात उतरले. पाण्यात उतरल्यावर या दोघांनाही सेल्फी घेण्याचा मोह आवरला नाही. सेल्फीच्या नादात त्यांचा तोल गेला आणि ते बुडाले. या दोघांचा मृत्यू झाला. पोलिसांनी दिलेल्या माहितीनुसार ५ मित्र सुट्टीचा आनंद लुटण्यासाठी आले होते. मात्र या दोघांच्या मृत्यूमुळे सगळ्यांनाच खूप दुःख झाले. या प्रकरणी केशोरी पोलीस ठाण्यात गुन्हा दाखल करण्यात आला असून पुढील तपास सुरु आहे.
