VIDEO: डेक्कन क्वीन येताच चार वर्षांच्या मुलासह ट्रॅकवर मारली उडी; एक्स्प्रेस अंगावरुन जाऊनही मुलगा सुरक्षित

आत्महत्या करणाऱ्या व्यक्तीची ओळख पटली आहे. प्रमोद आंधळे असं मयत व्यक्तीचं नाव आहे. ते उल्हासनगरमधील शांतीनगर भागात राहातात. ही संपूर्ण घटना सीसीटीव्हीत कैद झाली आहे.

कल्याण लोहमार्ग पोलिसांनी सांगितले की, “प्रवाशाने मुलासह डेक्कन क्वीनखाली उडी मारली. उडी मारताना चार वर्षाचा मुलगा या प्रवाशाच्या तावडीतून सुटून रुळांच्या मध्यभागी पडला. दोन रुळांच्या फटीमध्ये पडल्याने एक्स्प्रेस मुलावरून गेली, पण मुलगा सुरक्षित राहिला”.

अपघातात संबंधित प्रवाशाच्या शरीराचे दोन तुकडे झाले अशी माहिती कल्याण लोहमार्ग पोलीस ठाण्याचे वरिष्ठ पोलीस निरीक्षक विक्रम शार्दुल यांनी दिली आहे.

“आत्महत्या करणारा प्रवासी उल्हासनगरमधील रहिवासी आहे. बेस्टमध्ये चालक म्हणून नोकरी करत असल्याची प्राथमिक माहिती पोलिसांना मिळाली आहे. त्याच्या आत्महत्येमागील निश्चित कारण कळू शकले नाही,” असे पोलिसांनी सांगितले.