मुंबईतील प्रसिद्ध देवस्थान सिद्धिविनायक मंदिर न्यासाच्या अध्यक्षपदी शिवसेना ( शिंदे गट ) आमदार सदा सरवणकर यांची नियुक्ती करण्यात आली आहे. याआधी शिवसेना ( ठाकरे गट ) नेते, आदेश बांदेकर यांच्याकडे अध्यक्षदाची सूत्रे होती. यावरून आमदार आदित्य ठाकरे यांनी सदा सरवणकर यांच्यावर हल्लाबोल केला आहे.
‘एक्स’ ( ट्वीटर ) अकाउंटवर आदित्य ठाकरे म्हणाले, “दादरमध्ये यापूर्वी घडला नव्हता असा प्रकार ज्याने केला, आमच्या गणपती बाप्पाच्या मिरवणुकीत ज्याने बंदूक रोखली, टीव्हीवर देखील ते दाखवण्यात आलं. नंतर पोलिसांनीही सांगितलं की, गोळी त्यांच्याच बंदूकीतून चालवली गेली होती. त्या गद्दार व्यक्तीची चौकशी आणि अटक तर सोडाच, मिंधे-भाजप सरकारने आज त्यांना सिद्धिविनायक न्यासाचे अध्यक्ष म्हणून बसवले.”
हेही वाचा : सिद्धिविनायक मंदिर न्यासाच्या अध्यक्षपदी नियुक्ती झाल्यानंतर सदा सरवणकरांची पहिली प्रतिक्रिया, म्हणाले…
“हिंदू सणात विघ्न आणणाऱ्या त्या व्यक्तीचं लायसन्स आणि बंदूक जप्त झाली पाहिजे होती, अटक व्हायला हवी होती! पण… ह्या कृत्याबद्दल त्याला बक्षीसच मिळाल्याचं दिसतंय! मिंधे-भाजपा गँगच्या गद्दारांचं हे कोणतं हिंदुत्व?” असा सवालही आदित्य ठाकरेंनी उपस्थित केला आहे.
“आमच्या सणवाराला, गणपती बाप्पाच्या मिरवणुकीत बंदूक रोखणारे हे सिद्धिविनायक न्यासाचे अध्यक्ष म्हणून कसे शोभतात? खरंतर भाजपा किंवा गृहमंत्र्यांकडून ह्या गोष्टीचा विरोध व्हायला हवा होता. पण कदाचित हे गद्दारीचं आणि महाराष्ट्र द्वेषाचं बक्षीस दिलं असेल,” अशी टीकाही आदित्य ठाकरेंनी सदा सरवणकर यांच्यावर केली आहे.
