“सिल्लोडला गौतमी पाटीलचा कार्यक्रम ठेवू”, अब्दुल सत्तारांची घोषणा, अजित पवारांचं नाव घेत म्हणाले, “ज्यांचं वय…”

अब्दुल सत्तार म्हणाले, ज्यांचं वय डोळे मारण्याचं ते डोळे मारतात. आजकाल डोळे मारण्याचा सीझन सुरू आहे. ज्यांचं वय आहे डोळे मारण्याचं ते डोळे मारतात, किंवा ज्यांनी लहानपणी डोळे मारले नसतील ते आता मारू लागले आहेत. अजित पवार जे काही बोलतात त्याला महत्त्व आहे. कारण ते राज्याच्या विधानसभेचे विरोधी पक्षनेते आहेत.

दरम्यान, गौतमी पाटीलच्या डान्सच्या कार्यक्रमाबद्दल सत्तार यांना विचारल्यावर सत्तार म्हणाले, सिल्लोडला कृषी महोत्सवात मी त्यांचा कार्यक्रम मी बघितला आहे. तेव्हा खूप लोक होते. आपण पुन्हा एकदा हा कार्यक्रम ठेवू आणि त्यावेळी अजित पवारांना या कार्यक्रमाचं निमंत्रण देऊ.

यावेळी अब्दुल सत्तार यांना सवाल केला की, गौतमी पाटीलचा डान्स पाहता का? त्यावर सत्तार म्हणाले, मी सिल्लोडला त्यांचा कार्यक्रम पाहिला होता. परंतु मी लावण्या अनेकदा पाहिल्या आहेत. आपल्या राज्यात लावणी ही संस्कृती आहे. मी कधी डान्सबारमध्ये गेलो नाही, परंतु लावण्या पाहतो. कारण या नृत्यांगनांचा डोक्यापासून पायापर्यंत मराठी संस्कृतीला शोभेल असा वेश असतो. आपल्या संस्कृतीला शोभेल अशा लावण्यात असतात.